CSK vs PBKS: ఉత్కంఠపోరులో చెన్నైపై పంజాబ్‌ విజయం

చెన్నై: గత మ్యాచ్‌లో లఖ్‌నవూపై ఘోరంగా ఓటమిపాలైన పంజాబ్‌ కింగ్స్‌ తిరిగి పుంజుకుంది. ఆదివారం చెన్నైతో ఉత్కంఠపోరులో పంజాబ్‌ 4 వికెట్ల తేడాతో విజయం సాధించింది. ధోని సేన నిర్దేశించిన 201 పరుగుల లక్ష్యాన్ని ఛేదించేందుకు బరిలో దిగిన పంజాబ్‌ చివరి వరకూ పోరాడింది. ఆఖరి బంతికి మూడు పరుగులు కావాల్సిన సమయంలో సికిందర్‌ రజా (13*; 7 బంతుల్లో 1 ఫోర్‌) సమయస్ఫూర్తితో ఆడి జట్టుకు విజయాన్ని అందించాడు. పంజాబ్‌కు ఇది ఐదో విజయం కాగా.. చెన్నైకి నాలుగో ఓటమి. లక్ష్య ఛేదనలో భాగంగా పంజాబ్‌ ఓపెనర్లు ప్రభ్‌సిమ్రన్‌ సింగ్  (42; 24 బంతుల్లో 4 ఫోర్లు, 2 సిక్స్‌లు), శిఖర్‌ ధావన్‌ (28; 15 బంతుల్లో 4 ఫోర్లు, 1 సిక్స్‌)తో పాటు లివింగ్ స్టోన్‌ (40; 24 బంతుల్లో 1 ఫోర్, 4 సిక్స్‌లు) మెరుపులు మెరిపించారు. సామ్‌ కరన్‌ (29; 20 బంతుల్లో 1 ఫోర్‌, 1 సిక్స్‌ ఫర్వాలేదనిపించాడు. చివరిలో షారుక్‌ఖాన్‌ (2*; 3 బంతుల్లో), రజాలు ఆచితూచి ఆడటంతో విజయం పంజాబ్‌ సొంతమైంది. చెన్నై బౌలర్లలో తుషార్‌ దేశ్‌పాండే మూడు వికెట్లు తీయగా, రవీంద్ర జడేజా రెండు, మతీష పతిరణ ఒక దక్కించుకున్నారు.

అంతకుముందు టాస్‌ గెలిచి బ్యాటింగ్‌కు దిగిన చెన్నై.. ఓపెనర్ డేవాన్‌ కాన్వే (92*; 52 బంతుల్లో 16 ఫోర్లు, 1 సిక్స్‌) దంచికొట్టడంతో భారీ స్కోరు సాధించింది. నిర్ణీత  20 ఓవర్లలో సీఎస్కే నాలుగు వికెట్ల నష్టానికి 200 పరుగులు చేసింది. చివరి ఓవర్లో ఆఖరి రెండు బంతులను ధోనీ (13*; 4 బంతుల్లో) సిక్సర్లుగా మలిచాడు. రుతురాజ్‌ గైక్వాడ్ (37; 31 బంతుల్లో 4 ఫోర్లు, 1 సిక్స్‌) రాణించాడు. శివమ్ దూబె (28; 17 బంతుల్లో 1 ఫోర్‌, 2 సిక్స్‌లు) దూకుడుగా ఆడినా ఎక్కువసేపు క్రీజులో నిలవలేకపోయాడు. రవీంద్ర జడేజా (12; 10 బంతుల్లో), మొయిన్ అలీ (10; 6 బంతుల్లో 2 ఫోర్లు) తక్కువ స్కోరుకే పెవిలియన్‌ చేరారు. పంజాబ్‌ బౌలర్లలో అర్ష్‌దీప్‌, సామ్‌ కరన్‌, రాహుల్ చాహర్‌, సికిందర్‌ రజా ఒక్కో వికెట్ పడగొట్టారు.

చెన్నై-పంజాబ్‌ మ్యాచ్‌ ఓవర్‌ టు ఓవర్‌ అప్‌డేట్స్‌ కోసం క్లిక్‌ చేయండి