Google photos: గూగుల్‌ ఫొటోస్‌తో హైలైట్‌ వీడియో

గూగుల్‌ ఫొటోస్‌ ప్రియులకు శుభవార్త. దీనికి కొత్తగా హైలైట్‌ వీడియోలను సృష్టించుకోవటానికి తోడ్పడే ఫీచర్‌ను జోడించనున్నట్టు గూగుల్‌ ప్రకటించింది. ఇది మనకు ఇష్టమైన ప్రాంతాలు, వేడుకలు, పనులకు సంబంధించిన వీడియోలను సృష్టించి ముందుంచుతుంది. అదీ చాలా తేలికగా. గూగుల్‌ ఫొటోస్‌ యాప్‌ ఓపెన్‌ చేసి, గ్యాలరీలో పైన ఉండే ప్లస్‌ గుర్తును క్లిక్‌ చేయాలి. తర్వాత జాబితాలోంచి ‘హైలైట్‌ వీడియో’ ఆప్షన్‌ను ఎంచుకొని, ఏం కావాలో సెర్చ్‌ చేస్తే చాలు. ఉదాహరణకు- హైదరాబాద్‌, 2023 అని ఎంచుకున్నారనుకోండి. గూగుల్‌ ఫొటోస్‌ యాప్‌ తనకు తానే గ్యాలరీలోంచి మంచి క్లిప్స్‌, ఫొటోలను ఎంచుకొని వీడియోగా మలుస్తుంది. దానికి తగిన సంగీతాన్నీ జోడిస్తుంది. గుర్తుండిపోయే దృశ్యాలను, సందర్భాలను వీడియోగా మార్చుకోవాలనుకునేవారికిది బాగా ఉపయోగపడుతుంది. వీటిని ఆత్మీయులతో షేర్‌ చేసుకుంటే ఆ మజానే వేరు.