వైభవంగా వకుళమాత ఆలయ మహా సంప్రోక్షణ

ఈనాడు, తిరుపతి: తిరుపతి సమీపంలోని పాతకాల్వ వద్ద నిర్మించిన వకుళమాత ఆలయ మహాసంప్రోక్షణ గురువారం వైభవంగా జరిగింది. ఈ కార్యక్రమంలో ఏపీ సీఎం జగన్‌ పాల్గొన్నారు. ఆలయం వద్దకు చేరుకున్న సీఎంకు మంత్రి పెద్దిరెడ్డి రామచంద్రారెడ్డి, తితిదే ఈవో ధర్మారెడ్డి స్వాగతం పలికారు. అక్కడ తితిదే అధికారిక వృక్షం మానుసంపంగి మొక్క నాటారు. అక్కడి నుంచి ఆలయం వద్దకు చేరుకున్న సీఎంకు తితిదే వైఖానస ఆగమ సలహాదారు వేదాంతం విష్ణు భట్టాచార్య అర్చకులతో కలిసి పూర్ణకుంభ స్వాగతం పలికారు. ఆలయ మహాసంప్రోక్షణ శిలాఫలకాన్ని సీఎం ఆవిష్కరించారు. అక్కడి నుంచి ప్రదక్షిణగా ఆలయంలోకి చేరుకున్న సీఎం వకుళమాతను దర్శించుకున్నారు. అనంతరం ముఖ్యమంత్రికి వేదపండితులు వేద ఆశీర్వాదం చేశారు. తితిదే ఈవో ధర్మారెడ్డి ముఖ్యమంత్రికి డ్రై ఫ్లవర్‌ సాంకేతికతతో తయారుచేసిన వకుళమాత ఫొటోఫ్రేమ్‌, తీర్థ ప్రసాదాలు అందించారు. తర్వాత ఆలయ నిర్మాణంలో భాగస్వాములైన పలువురిని సీఎం సత్కరించి బంగారు కడియాలు తొడిగారు.