గ్రామాల్లో మలేరియా ముప్పుపై హక్కుల కమిషన్‌ నోటీసులు

నారాయణగూడ, న్యూస్‌టుడే: రాష్ట్రంలోని 587 గ్రామాల్లో మలేరియా ముప్పు పొంచి ఉందని, ఆ గ్రామాల్లో నివసించే 2,36,317 మంది ఆరోగ్యాలపై దీని ప్రభావం పడే ప్రమాదముందంటూ వైద్య, ఆరోగ్య శాఖ సర్వేలో వెల్లడైందని ఇటీవల మీడియాలో వచ్చిన కథనాలపై రాష్ట్ర మానవ హక్కుల కమిషన్‌ స్పందించింది. భద్రాద్రి కొత్తగూడెం, ఖమ్మం, మహబూబాబాద్‌, ములుగు, భూపాలపల్లి, వరంగల్‌ జిల్లాల్లోని గ్రామాల్లో మలేరియా ముప్పు ఉందని అధికారులు గుర్తించినట్లు వార్తలు వచ్చాయి. వీటిని రాష్ట్ర మానవ హక్కుల కమిషన్‌ సుమోటోగా తీసుకుంది. ఆయా గ్రామాల్లో మలేరియా నివారణకు తీసుకుంటున్న చర్యలపై సెప్టెంబరు 28లోపు నివేదిక అందించాలంటూ మలేరియా, ఫైలేరియా శాఖల అదనపు సంచాలకులు, స్టేట్‌ ప్రోగ్రాం ఆఫీసర్‌, వైద్య, ఆరోగ్య శాఖ సంచాలకులకు కమిషన్‌ నోటీసులు పంపించింది.