జాహ్నవి మృతిపై నవ్వలేదు.. సియాటెల్‌ పోలీసు వివరణ

ఇంటర్నెట్‌ డెస్క్‌: అమెరికాలో జరిగిన రోడ్డు ప్రమాదంలో తెలుగు విద్యార్థిని జాహ్నవి మృతి చెందడంపై అక్కడి పోలీసు అధికారి చులకనగా మాట్లాడటంతో తీవ్ర విమర్శలు వచ్చిన సంగతి తెలిసిందే. ఆ అధికారిపై కఠిన చర్యలు తీసుకోవాలని అగ్ర రాజ్యాన్ని భారత్‌ డిమాండ్‌ చేసింది. అయితే తాజాగా ఈ కేసులో కీలక పరిణామం చోటుచేసుకుంది. ఆ వ్యాఖ్యలు జాహ్నవిని ఉద్దేశించి చేసినవి కావని పోలీసు అధికారి చెప్పారు. ఆంధ్రప్రదేశ్‌లోని కర్నూలు జిల్లాకు చెందిన కందుల జాహ్నవి (23) ఈ ఏడాది జనవరిలో సియాటెల్‌లోని పోలీసు పెట్రోలింగ్‌ వాహనం ఢీకొని మృతి చెందిన విషయం తెలిసిందే. ఈ కేసు దర్యాప్తు గురించి పోలీసు అధికారి డేనియల్‌ అడెరెర్‌.. చులకనగా మాట్లాడుతూ.. పగలబడి నవ్విన వీడియో ఒకటి ఇటీవల వైరలైంది. ‘ఆమె ఓ సాధారణ వ్యక్తి.. ఈ మరణానికి విలువ లేదు’ అన్నట్లుగా ఆయన మాట్లాడటం దుమారం రేపింది. దీంతో ఆ అధికారిపై చర్యలు తీసుకోవాలని డిమాండ్లు వెల్లువెత్తాయి. ఈ నేపథ్యంలోనే  డేనియల్‌పై ఉన్నతాధికారులు దర్యాప్తు చేపట్టారు. తాజాగా ఈ వివాదంపై సియాటెల్‌ పోలీసు అధికారుల గిల్డ్‌ ఓ ప్రకటన విడుదల చేసింది. ‘వైరల్‌ అయిన దృశ్యాలు బాడీ కెమెరా వీడియో రికార్డు చేసినవి. ఆ సంభాషణల్లో ఒకవైపే బయటికొచ్చింది. అందులో చాలా వివరాలున్నాయి. అవి ప్రజలకు తెలియవు. పూర్తి వివరాలు తెలియకపోవడంతో అక్కడ అసలేం జరిగిందో చెప్పడంలో మీడియా విఫలమైంది’ అంటూ డేనియల్‌కు మద్దతుగా గిల్డ్‌ వ్యాఖ్యానించింది. ఈ ఘటనపై ఉన్నతాధికారులకు డేనియల్‌ రాసిన లేఖను గిల్డ్‌ విడుదల చేసింది. ఇలాంటి ఘటనలు జరిగినప్పుడు న్యాయస్థానంలో వాదనలు ఎంత హాస్యాస్పదంగా ఉంటాయో గుర్తొచ్చి తాను నవ్వానని.. బాధితురాలిని అవమానించేలా తాను ఉద్దేశపూర్వకంగా ఎలాంటి వ్యాఖ్యలు చేయలేదని చెప్పారు.