Mumbai Indians: ముంబయి ఇండియన్స్‌లో హార్దిక్‌పై అసంతృప్తి..!

ఇంటర్నెట్‌డెస్క్‌: ముంబయి ఇండియన్స్‌ (Mumbai Indian) జట్టులో అంతర్గతంగా ఉన్న అసంతృప్తులు.. వరుస ఓటములతో బహిర్గతమవుతున్నట్లు సమాచారం. కొందరు సీనియర్‌ ఆటగాళ్లు.. డ్రెస్సింగ్‌ రూమ్‌ పరిస్థితి, హార్దిక్‌ నాయకత్వంతో వస్తోన్న ఇబ్బందులను కోచింగ్‌ సిబ్బందికి వెల్లడించినట్లు ఓ ఆంగ్ల పత్రిక కథనంలో పేర్కొంది. ఆడిన 12 మ్యాచుల్లో 8 ఓడిపోయి.. అధికారికంగా ఎలిమినేట్‌ అయిన తొలి జట్టుగా ముంబయి నిలిచింది. మరో వైపు రోహిత్‌ నాయకత్వంలో దాదాపు పదేళ్లు ఆడిన జట్టు.. హార్దిక్‌ శైలికి ఇంకా అలవాటు పడలేదనిపిస్తోంది. డ్రెస్సింగ్‌ రూమ్‌లో సందడి కరవు కావడానికి కొత్త కెప్టెన్‌ శైలే కారణమని సీనియర్లు.. కోచ్‌ బృందానికి వెల్లడించారు.

ఇటీవల ఓ మ్యాచ్‌ సందర్భంగా ముంబయి ఆటగాళ్లు, జట్టు కోచింగ్‌ సిబ్బంది సమావేశమయ్యారు. దీనిలో రోహిత్‌, సూర్య, బుమ్రా తదితర సీనియర్లు కూడా పాల్గొన్నారు. జట్టు సరిగ్గా ఆడలేకపోవడంపై భోజనాల సమయంలో తమ అభిప్రాయాలను వారు వెల్లడించారు. ఆ తర్వాత సీనియర్లు, జట్టు మేనేజ్‌మెంట్ బృందంతో ఒక్కొక్కరుగా మాట్లాడినట్లు తెలిసింది. దీనిపై ముంబయి జట్టు అధికారి ఒకరు మాట్లాడుతూ.. ‘‘రోహిత్‌ నాయకత్వంలో పదేళ్లు ఆడిన జట్టు కొత్త మార్పునకు అలవాటు పడలేదు. సాధారణంగా ఎక్కడైనా నాయకత్వ మార్పు చోటు చేసుకుంటే తలెత్తే బాలారిష్టాలాంటివే ఇవి కూడా’’ అని వ్యాఖ్యానించారు.

తిలక్‌ వర్మపై నిందలతో వివాదం..

ఇటీవల దిల్లీతో జరిగిన మ్యాచ్‌లో ఓటమికి టాప్‌ స్కోరర్‌ తిలక్‌ వర్మను హార్దిక్‌ తప్పుపట్టడం అందరినీ ఆశ్చర్యపర్చింది. అతడికి మ్యాచ్‌ పరిస్థితిపై అవగాహన లేకపోవడమే ఓటమికి కారణమని వ్యాఖ్యానించాడు. ‘‘అక్షర్‌ పటేల్‌ (డీసీ బౌలర్‌) ఓ లెఫ్ట్‌ హ్యాండర్‌కు (తిలక్‌) బౌలింగ్‌ చేస్తున్నాడు. ఆ సమయంలో సదరు బ్యాటర్‌ అతడిపై దూకుడుగా ఆడి ఉండాల్సింది. ఆటపై ఉండే ఈ చిన్న అవగాహన లోపించడంతో మ్యాచ్‌లో మూల్యం చెల్లించుకున్నాం’’ అని పేర్కొన్నాడు. ఈ మ్యాచ్‌లో తిలక్‌ 32 బంతుల్లో 63 పరుగులు చేశాడు.

ఏకపక్షంగా ఓటమి మొత్తాన్ని తనపై నెట్టేయడంతో తిలక్‌ వర్మ నొచ్చుకున్నట్లు తెలుస్తోంది. ఈ విషయాన్ని డ్రెస్సింగ్‌ రూమ్‌లో అతడు హార్దిక్‌ వద్ద ప్రస్తావించినట్లు వార్తలొచ్చాయి. ఈ సమయంలో ఇద్దరి మధ్య వాగ్వాదం జరిగినట్లు ప్రచారం జరిగింది.

జట్టులో వర్గాలున్నట్లు కనిపిస్తోంది: క్లార్క్‌

ముంబయి జట్టుపై ఆస్ట్రేలియా మాజీ ఆటగాడు మైకెల్‌ క్లార్క్‌ ఆసక్తికర కామెంట్లు చేశాడు. వారి ఆటతీరు చూస్తుంటే వర్గాలుగా విడిపోయినట్లు కనిపిస్తోందన్నారు. ‘‘ఆ జట్టు డ్రెస్సింగ్‌ రూమ్‌లో చాలా గ్రూపులు ఉన్నట్లు భావిస్తున్నా. వారు సమష్టిగా లేరు.. ఓ జట్టులాగా ఆడటంలేదు’’ అని అన్నాడు.