Hezbollah: హెజ్‌బొల్లా ప్రతీకార దాడులు.. ఇజ్రాయెల్‌పై 60కిపైగా రాకెట్లు!

ఇంటర్నెట్‌ డెస్క్‌: ఇజ్రాయెల్‌ (Israel)పై లెబనాన్‌ తీవ్రవాద దళం హెజ్‌బొల్లా (Hezbollah) ప్రతీకార దాడులకు దిగింది. శనివారం 60కిపైగా రాకెట్లతో విరుచుకుపడింది. ‘మౌంట్ మెరోన్‌’పై ఉన్న గగనతల నిఘా స్థావరం వైపు 62 రాకెట్లను ప్రయోగించామని, అవి నేరుగా లక్ష్యాన్ని తాకాయని వెల్లడించింది. బీరుట్‌ సమీప ప్రాంతంలో సీనియర్‌ హమాస్‌ నేతను హతమార్చిన ఘటనపై ప్రతీకారం తీర్చుకుంటామని ప్రకటించిన మరుసటి రోజే ఈ దాడులు నిర్వహించింది. ఇది కేవలం ప్రారంభమేనని పేర్కొంది.

వీళ్ల దగ్గర లక్షకు పైగా రాకెట్లున్నాయి.. ఇజ్రాయెల్‌కు ‘హెజ్‌బొల్లా’ సవాల్‌!

ఇజ్రాయెల్‌ జరిపినట్లుగా భావిస్తున్న ఇటీవలి దాడిలో హమాస్‌ డిప్యూటీ రాజకీయ నేత సలేహ్‌ అరౌరి హతమైన విషయం తెలిసిందే. దీనికి గట్టి బదులు ఇవ్వని పక్షంలో లెబనాన్ మొత్తం ఇజ్రాయెల్ దాడులకు గురవుతుందని ఉగ్రసంస్థ నాయకుడు హసన్‌ నస్రల్లా శుక్రవారం పేర్కొన్నాడు. హెజ్‌బొల్లా దాడులను టెల్‌ అవీవ్‌ ధ్రువీకరించింది. రాకెట్లు ప్రయోగించిన ఉగ్రవాదులపై ఎదురుదాడి చేపట్టినట్లు వెల్లడించింది. ఇరువైపులా ప్రాణనష్టం వివరాలు తెలియరాలేదు.