India China: చైనా టార్చ్‌బేరర్‌ వివాదం.. భారత్‌ దీటైన నిర్ణయం!

దిల్లీ: బీజింగ్‌ వింటర్ ఒలింపిక్స్‌లో టార్చ్‌బేరర్‌గా గల్వాన్‌ ఘర్షణలో గాయపడిన ఆర్మీ అధికారిని ఎంపిక చేస్తూ చైనా తీసుకున్న నిర్ణయంపై భారత్‌ తీవ్రంగా స్పందించింది. వింటర్‌ ఒలింపిక్స్‌ను రాజకీయాలకు వేదికగా ఎంచుకోవడం విచారకరమని పేర్కొంది. ఈ క్రమంలో బీజింగ్ వింటర్ ఒలింపిక్స్ ప్రారంభ, ముగింపు వేడుకల్లో చైనాలోని భారత రాయబారి పాల్గొనరని విదేశాంగశాఖ అధికార ప్రతినిధి అరిందమ్‌ బాగ్చి గురువారం వెల్లడించారు. మరోవైపు.. ఈ విశ్వక్రీడల ప్రారంభ, ముగింపు వేడుకలను ‘దూరదర్శన్’ ప్రసారం చేయబోదని ప్రసార భారతి సీఈవో శశి శేఖర్ వెంపటి ప్రకటించారు. ఈ మేరకు ఆయన ఓ ట్వీట్‌ చేశారు.

2020లో భారత్‌- చైనా సరిహద్దులోని గల్వాన్‌ లోయలో ఇరుదేశాలకు చెందిన సైనికుల మధ్య ఘర్షణ జరిగిన విషయం తెలిసిందే. ఈ ఘటనలో ఇరు వర్గాలకు ప్రాణనష్టం జరిగింది. ఆ సమయంలో తీవ్రంగా గాయపడిన సైనిక కమాండర్‌ కర్నల్‌ క్వీ ఫాబోవాను చైనా.. వింటర్ ఒలింపిక్స్ టార్చ్‌ బేరర్‌గా నియమించిందని గ్లోబల్‌ టైమ్స్‌ కథనం పేర్కొంది. అంతర్జాతీయంగా చర్చనీయాంశమైన ఈ ఎంపికను అమెరికా సైతం తప్పుపట్టింది. ఈ చర్య సిగ్గు చేటు అంటూ విమర్శించింది. మరోవైపు గల్వాన్‌ లోయలో జరిగిన ఘర్షణలో డ్రాగన్‌ చెప్పినదానికంటే ఎక్కువే నష్టపోయిందని తాజాగా ఓ ఆస్ట్రేలియన్‌ వార్తాసంస్థ పేర్కొన్న విషయం తెలిసిందే.