Sri Lanka Crisis: శ్రీలంక అధ్యక్షుడికి కొత్త ప్రధాని ఝులక్‌.. రాజీనామా డిమాండ్‌కు మద్దతు!

కొలంబో: శ్రీలంక ప్రధానిగా బాధ్యతలు చేపట్టిన రణిల్​ విక్రమ్​ సింఘే అధ్యక్షుడు గొటబాయ రాజపక్సకు దిమ్మతిరిగే ఝలక్​ ఇచ్చారు. గొటబాయ రాజీనామా చేయాలని నెలరోజులుగా ఆందోళనలు చేస్తున్న వారికి మద్దతు పలికారు. ‘గొట గో హోమ్’​ నిరసనకారుల డిమాండ్లను పరిశీలించేందుకు కమిటీని ఏర్పాటు చేస్తున్నట్లు తాజాగా ప్రకటించారు. ఓ టీవీ ఛానల్​కు ఇచ్చిన ఇంటర్వ్యూలో ఆయన ఈ వ్యాఖ్యలు చేశారు. ‘‘దేశంలోని రాజకీయ వ్యవస్థను మార్చేందుకు ‘గొట గో హోమ్’​ నిరసనలు కొనసాగాలి. అందుకు దేశంలోని యువత బాధ్యత తీసుకోవాలి. గ్రామాల్లో నిరసనలు చేస్తున్న యువతకు రక్షణ కల్పిస్తాం. భవిష్యత్తు విధాన రూపకల్పన కోసం వారి అభిప్రాయాలు తెలుసుకుంటాం’’ అని రణిల్​ విక్రమ్​ సింఘే పేర్కొన్నారు.

ఆర్థిక సంక్షోభంలో కూరుకుపోయిన శ్రీలంకలో ప్రజలు పెద్దఎత్తున నిరసనలు చేపట్టారు. ఏప్రిల్​ 9 నుంచి కొలంబోలోని గాలే ఫేస్​ గ్రీన్​లో గొటబాయకు వ్యతిరేకంగా ఆందోళనలు కొనసాగుతున్నాయి. ఈ నిరసనల్లో ఇప్పటికే తొమ్మిది మంది ప్రాణాలు కోల్పోగా, 200 మందికిపైగా గాయపడ్డారు. ఈ క్రమంలోనే మహింద రాజపక్సను ప్రధాని పదవి నుంచి తొలగించిన అధ్యక్షుడు గొటబాయ రాజపక్స.. యునైటెడ్​ నేషనల్​ పార్టీ నేత రణిల్​ విక్రమ్​ సింఘే(73)ను 26వ ప్రధానిగా నియమించారు. అందుకు పార్లమెంట్​లోని అన్ని పార్టీలు మద్దతు తెలిపాయి. దేశ భద్రతను బలోపేతం చేసేందుకు అన్ని చర్యలు తీసుకుంటున్నట్లు శ్రీలంక ప్రభుత్వం తెలిపింది.