Zelensky: హఠాత్తుగా బ్రిటన్‌ చేరుకొన్న జెలెన్‌స్కీ.. ఉక్రెయిన్‌ పైలట్లకు అక్కడ శిక్షణ

ఇంటర్నెట్‌డెస్క్‌: ఉక్రెయిన్‌ అధ్యక్షుడు జెలెన్‌స్కీ(Zelensky) బ్రిటన్‌ చేరుకొన్నారు. రష్యాతో యుద్ధం మొదలైన తర్వాత నుంచి ఆయన యూకే రావడం ఇదే తొలిసారి. ఈ పర్యటన వివరాలు ముందుగా ఎక్కడా బయటకు వెల్లడికాలేదు. ఈ పర్యటనలో ఆయన బ్రిటన్‌ ప్రధాన మంత్రి రిషిసునాక్‌(Rishi Sunak)తో కూడా భేటీ కానున్నారు. యూకే పార్లమెంట్‌ను ఉద్దేశించి కూడా ఆయన ప్రసంగించే అవకాశాలున్నాయి. దీంతోపాటు ఉక్రెయిన్‌ దళాలకు శిక్షణ ఇస్తున్న కేంద్రాలను కూడా సందర్శించనున్నారు.

ఈ పర్యటనపై యూకే ప్రధాని రిషి సునాక్‌ మాట్లాడుతూ జెలెన్‌స్కీ పర్యటన ఆ దేశ ధైర్యాన్ని, పోరాట స్ఫూర్తి, బ్రిటన్‌తో ఉన్న విడదీయరాని బంధాన్ని తెలియజేస్తోందన్నారు. 2014 నుంచి ఆ దేశం ఆత్మరక్షణ చేసుకొంటూ సార్వభౌమాధికారాన్ని కాపాడుకొనేలా దళాలకు యూకే కీలకమైన శిక్షణ ఇస్తోందని తెలిపారు. ‘‘మా శిక్షణ కార్యక్రమాన్ని ఉక్రెయిన్‌ సైనికుల నుంచి మెరైనర్లు, పైలట్లకు విస్తరిస్తున్నామని చెప్పడానికి సంతోషిస్తున్నాను. కేవలం తాత్కాలికంగా సైనిక సామగ్రి ఇవ్వడమే కాకుండా.. వచ్చే మరికొన్నేళ్లు దీర్ఘకాలం ఆ దేశంతో కలిసి ఉంటామన్న  నిబంద్ధతను తెలియజేస్తోంది’’ అని బ్రిటన్‌ ప్రధాని రుషిసునాక్‌ పేర్కొన్నారు.