ఓ స్థాయి వరకూ చలి కూడా ఎంతో హాయిగా ఉంటుంది. అది దాటితే మాత్రం ఉక్కిరిబిక్కిరి చేస్తుంది. ఇప్పుడు చాలా దేశాల్ని చలి గజగజలాడించేస్తోంది. ప్రమాదకరంగా మారిన ఆ చలి తీవ్రత నీటిని మంచు ముద్దలా గడ్డకట్టించేస్తుంది. అలా చలికోరల్లో గడ్డకట్టుకు పోయింది చైనాలోని సాంగ్హువా నది. దాంతో మంచు ముద్దలా మారిన నీరు ప్రకృతి చెక్కినట్టుగా ఓ అందమైన పూబాల అవతారమెత్తి కనువిందు చేస్తోంది. ఆ మంచుపువ్వుపైన లేలేత భానుడి కిరణాలు పడటంతో బంగారు వెలుగుల్ని విరజిమ్ముతూ ప్రకృతికే కొత్తందాలను తీసుకొచ్చింది. సరస్సులో విరిసిన ఆ మంచు పుష్పం పలువుర్ని ఆకట్టుకోవడంతో సోషల్‌మీడియాలో షేర్‌ చేశారు. అది కాస్తా వైరల్‌ కావడంతో మన వరకూ వచ్చి చేరింది.