ఆ ప్రేమలేఖలు మంచి జ్హాపకాలు

ఎదుటివారి పట్ల ఉన్న ప్రేమను తెలియజేసేందుకు ప్రేయసీప్రియులు ప్రేమలేఖలు రాసుకోవడమనేది తెలిసిందే. ఇప్పుడు అవి ఉన్నాయా లేవా అనేది పక్కనపెడితే... తెరపైన ప్రేమను పండించే ఈ తారలు తమ ప్రేమలేఖల కహానీలను చెబుతున్నారిలా...

ఆ అమ్మాయి ఓకే చెప్పింది

- నాని

నేనెవరికీ ప్రేమలేఖ రాయలేదు, అందుకోలేదు కానీ... ఓ ప్రేమలేఖ నాలో ఆత్మవిశ్వాసాన్ని పెంచింది. నేను సిద్ధార్థ రెసిడెన్షియల్‌లో ఉన్న రోజులవి. డే స్కాలర్స్‌ అయిన అమ్మాయిలు
మా డార్మిటరీ మీదుగానే కాలేజీకి వెళ్లేవారు. మాతో ఉండే ఓ అబ్బాయి ఆ అమ్మాయిల్లో ఒకరికి లవ్‌లెటర్‌ రాశాడోసారి. అందులో అతడు తన వివరాలను చెప్పకుండా తనని ఇష్టపడితే మర్నాడు ఎనిమిది గంటలకల్లా డార్మిటరీ 1 దగ్గరకు వచ్చి కలవమని రాశాడు. మర్నాడు అదే సమయానికి అక్కడ అనుకోకుండా నేను నిల్చుని ఉన్నా. కాసేపటికి ఓ అమ్మాయి వచ్చి ‘ఓకే’ అనేసి వెళ్లిపోయింది. నాకేమీ అర్థంకాలేదు. చివరకు వార్డెన్‌ పిలిచి తిట్టడంతో నాకు ఆ ఉత్తరం గురించి తెలిసింది. అయితే నాకూ అమ్మాయిలు పడతారనే ఆత్మవిశ్వాసం మాత్రం నాలో కలిగిందనుకోండీ.

విందు ఖరీదు లక్ష రూపాయలు!

ఆ ఉత్తరాన్ని దాచుకున్నా

-కీర్తి సురేష్‌

కొన్నాళ్ల క్రితం నేనో నగల దుకాణం ప్రారంభోత్సవానికి వెళ్తే గుంపులోంచి ఓ అబ్బాయి గబగబా వచ్చి నా చేతికి పెద్ద పుస్తకాన్ని ఇచ్చేసి వెళ్లిపోయాడు. ఆ తరువాత దాన్ని తెరిచి చూస్తే అందులో నాకు సంబంధించిన ఫొటోలతోపాటు ఓ ఉత్తరం కూడా కనిపించింది. తనని పెళ్లి చేసుకోమని అడుగుతూ ఆ అబ్బాయి నాకు రాసిన ప్రేమలేఖ అది. విచిత్రం ఏంటంటే... ఉత్తరంతోపాటూ ఆ అబ్బాయి ఫొటో, వ్యక్తిగత వివరాలు కూడా అందులో ఉన్నాయి. మొత్తం చదివాక ఒక్క క్షణం షాకయ్యా గానీ ఆ తరువాత నవ్వొచ్చింది. అది నేను అందుకున్న మొదటి లవ్‌లెటర్‌ కావడంతో నా దగ్గర అలాగే దాచుకున్నా.అదేంటీ అంటారేమో... చదువుకుంటున్నప్పుడు నాకు ఒక్కరు కూడా లవ్‌లెటర్‌ రాయలేదు మరి.

అది చదివి కొట్టారు

- సాయి పల్లవి

నేను రాసుకున్న మొదటి - చివరి ప్రేమలేఖ నాకు ఇప్పటికీ గుర్తే. అప్పుడు నేను ఏడో తరగతిలో ఉన్నాననుకుంటా. ఎందుకో తెలియదు కానీ నాకు మా స్కూల్లో ఓ అబ్బాయి బాగా నచ్చాడు. ఆ విషయాన్ని అతడికెలా చెప్పాలో తెలియక నాకు తోచినట్లుగా ఓ లవ్‌లెటర్‌ను రాశాను. ఉత్తరం అయితే పూర్తయ్యింది కానీ ఆ అబ్బాయికి ఇవ్వడానికి ధైర్యం సరిపోక నా దగ్గరే పెట్టుకున్నా. ఓరోజు ఇంట్లోవాళ్లు ఆ ఉత్తరాన్ని చూసి నన్ను బాగా తిట్టారు, కొట్టారు. దాంతో మరోసారి నేను అలాంటి పనిచేయక పోయినా... ఆ దెబ్బలు నాకు ఇంకా గుర్తున్నాయి. ఆ వయసులో ఆ తరహా ఉత్తరం ఎలా రాయగలిగాననేది నాకు ఇప్పటికీ అర్థం కాదు కానీ ఆ సందర్భాన్ని తలచుకున్నప్పుడు మాత్రం నవ్వొస్తుంది.

అయిదో తరగతిలో అందుకున్నా

- అదితిరావ్‌ హైదరీ

అప్పుడు నేను అయిదో తరగతిలో ఉన్నా. ఓరోజు మా సీనియర్‌ నుంచి ఉత్తరాన్ని అందుకున్నా. ఇంటికెళ్లి తెరిచి చూస్తే రెండు పేజీల్లో రాసిన ప్రేమలేఖ అది. దాన్ని ఒకటికి రెండుసార్లు చదివాక చాలా థ్రిల్లింగ్‌గా, గర్వంగా అనిపించింది. ఆ వయసులో ఒక అబ్బాయి నుంచి లవ్‌లెటర్‌ అందుకున్నందుకు నన్ను నేను చాలా గొప్పగా ఊహించుకున్నా. దాన్ని ఎవరో ఒకరికి చూపించాలనిపించింది. ఆ ఎవరో అమ్మే ఎందుకు కాకూడదని అమ్మ దగ్గరకు వెళ్లి నవ్వుతూ ఉత్తరాన్ని అందించా. అమ్మ దాన్ని చదివాక ఏమనలేదు కానీ కొన్ని రోజులకే నన్ను బోర్డింగ్‌ స్కూల్‌కు పంపించేసింది.

బోలెడు రాసేవాడిని

- రణ్‌బీర్‌ కపూర్‌

చదువుకుంటున్న రోజుల్లోనే... అమ్మాయిలకు ప్రేమలేఖలు రాసేవాడిని. అంతేనా... ఆ రోజుల్లో అమ్మానాన్నలూ, తాతా నానమ్మలు రాసుకున్న ఉత్తరాలను తీసుకుని ఎవరూ చూడకుండా చదవడమూ నేను ఇష్టంగా చేసే పనుల్లో ఒకటి. ఇప్పుడు ఆలోచిస్తే ఆ ఉత్తరాల్లో స్వచ్ఛమైన ప్రేమ, ఒకరిపట్ల మరొకరికి ఉన్న శ్రద్ధ కనిపించేవి. ఈ రోజుల్లో అవన్నీ తగ్గిపోయాయి కానీ నిజంగా ఉత్తరాలకు ఉన్న విలువే వేరు. అందుకే ఇప్పుడు ఆలియా మా అమ్మాయి పేరుమీద ఒక ఈ మెయిల్‌ ఐడీని పెట్టి రోజుకో ఉత్తరం రాయడాన్ని ఓ అలవాటుగా పెట్టుకుంది. ఆలియాలా నేను కూడా మా అమ్మాయికి ఆసక్తికరమైన ఉత్తరాలు రాయాలని అనుకుంటున్నా.