చోరీకొస్తే సీన్‌ రివర్స్‌.. విసుగొచ్చి వెళ్లిపోయిన దొంగ

వాషింగ్టన్‌: పట్టపగలే దొంగతనం చేద్దామని ప్రయత్నించిన ఓ దొంగకు ప్లాన్‌ అంతా బెడిసి కొట్టింది. చేతిలో ఆయుధం ఉందని బెదిరించి డబ్బులు దోచుకునేందుకు ప్రయత్నించాడో దొంగ. కానీ అక్కడున్నవారు భయపడకపోగా, తాపీగా సినిమా చూసినట్టు చూశారు. దీంతో విసిగిపోయి ఆ దొంగ నిరాశతో అక్కడి నుంచి వెళ్లిపోయాడు. అమెరికాలో జరిగిన ఈ ఘటనకు సంబంధించిన వీడియో ఒకటి ప్రస్తుతం సోషల్‌మీడియాలో తెగ వైరల్‌ అవుతోంది. అసలేం జరిగిందంటే..

ఈ ఘటన అమెరికాలోని అట్లాంటాలో నెయిల్ ఫస్ట్ సెలూన్‌లో గత సోమవారం చోటుచేసుకుంది. సెలూన్‌ కస్టమర్లతో బిజీగా ఉన్న సమయంలో ఓ వ్యక్తి లోపలికి చొరబడ్డాడు. అక్కడున్న సిబ్బందిని, కస్టమర్లను డబ్బులు ఇవ్వమని బెదిరించాడు. చేతిలో చిన్న బ్యాగ్‌ పట్టుకుని అందులో తుపాకీ ఉందని డబ్బులు ఇవ్వకపోతే చంపేస్తానని బెదిరించాడు. కానీ అతడి బెదిరింపులను ఎవరూ పట్టించుకోలేదు. అతడు ఓ వైపు అరుస్తుంటే కౌంటర్‌ దగ్గర ఉన్న వ్యక్తి తాపీగా ఫోన్‌ మాట్లాడాడు. ఒక మహిళ లేచి మాత్రం కాస్త కంగారుపడి బయటకు వెళ్లిపోయినా.. మిగతా వారంతా తమకేం పట్టన్నట్లు అలాగే కూర్చున్నారు. దొంగ ఎన్ని సార్లు బెదిరించినా.. ఎవరూ పట్టించుకోకపోవడంతో అతడు విసిగిపోయి అక్కడి నుంచి వెళ్లిపోయాడు.

• ఇది చూశారా: ‘టేకాఫ్‌ కష్టం.. కొందరు దిగిపోండి!’.. ప్రయాణికులకు వింత అనుభవం

ఈ తతంగమంతా అక్కడున్న సీసీటీవీల్లో రికార్డయ్యింది. అట్లాంటా పోలీసులు ఈ ఘటనపై దర్యాప్తు చేపట్టారు. ఇందుకు సంబంధించిన దృశ్యాలను సోషల్‌మీడియాలో పోస్ట్ చేయడంతో ఇది తెగ వైరల్‌ అవుతోంది. ఈ చోరీ తీరును చూసి నెటిజన్లు పగలబడి నవ్వుకుంటున్నారు.