Andhra News: పోలీసులు వెంబడించడంతో.. జలాశయంలోకి గంజాయి వాహనం

రంపచోడవరం: అల్లూరి సీతారామరాజు జిల్లా రంపచోడవరం మండలం భూపతిపాలెం వద్ద గంజాయి తరలిస్తున్న కారు జలాశయంలోకి దూసుకెళ్లింది. ఆంధ్రా- ఒడిశా సరిహద్దు నుంచి మైదాన ప్రాంతం రహదారిపైకి వస్తున్న గంజాయి తరలిస్తున్న వాహనాన్ని గుర్తించిన పోలీసులు వెంబడించారు. ఇది గమనించిన గంజాయి వాహన డ్రైవర్‌ వేగంగా నడిపాడు. ఈ క్రమంలో భూపతిపాలెం వద్ద డివైడర్‌ను ఢీకొట్టిన కారు అక్కడే ఉన్న జలాశయంలోకి దూసుకెళ్లింది.

కారులో ఉన్న ఒక వ్యక్తి పరారవ్వగా.. మరొకరిని పోలీసులు అదుపులోకి తీసుకున్నారు. క్రేన్‌ సాయంతో జలాశయంలో పడిన వాహనాన్ని బయటకు తీశారు. అందులోని 300కిలోల గంజాయిని సీజ్‌ చేశారు. ఘటనపై కేసు నమోదు చేసి దర్యాప్తు చేస్తున్నట్లు పోలీసులు తెలిపారు.