ప్రజలందరికీ మంచి జరగాలి

సంక్రాంతి వేడుకల్లో పాల్గొన్న సీఎం జగన్‌ దంపతులు  
క్యాంపు కార్యాలయం వద్ద గోశాలలో సంబరాలు

ఈనాడు, అమరావతి: ముఖ్యమంత్రి క్యాంపు కార్యాలయంలోని గోశాల ఆవరణలో శుక్రవారం సంక్రాంతి సంబరాలను నిర్వహించారు. పల్లె వాతావరణాన్ని ప్రతిబింబించేలా ఆవరణను తీర్చిదిద్దారు. ముఖ్యమంత్రి జగన్‌, భారతి దంపతులు పాల్గొన్నారు. సంప్రదాయ పంచెకట్టులో వేడుకలకు హాజరైన సీఎం గోవులకు పూజ చేశారు. భోగి మంటలు, హరిదాసుల కీర్తనలు, గంగిరెద్దుల విన్యాసాలు, డప్పు   కళాకారుల ప్రదర్శన, కోలాటాలు, చిన్నారుల నృత్య ప్రదర్శనల    వంటి సాంస్కృతిక కార్యక్రమాలను నిర్వహించారు.

ముఖ్యమంత్రి దంపతులు నులక మంచం మీద కూర్చొని ప్రదర్శనలను తిలకించారు. హరిదాసుకు సీఎం దంపతులు ధాన్యం వితరణ చేశారు. పిండి వంటలను రుచి చూశారు. రాష్ట్ర ప్రజలందరికీ మంచి జరగాలని పేర్కొన్నారు. రాష్ట్ర ప్రభుత్వ విప్‌ చెవిరెడ్డి భాస్కరరెడ్డి ఆధ్వర్యంలో నిర్వహించిన ఈ సంబరాల్లో మంత్రి వెలంపల్లి శ్రీనివాసరావు, తితిదే ఛైర్మన్‌ వైవీ సుబ్బారెడ్డి, ఎంపీ బాలశౌరి, పలువురు ఎమ్మెల్యేలు, ఎమ్మెల్సీలు, ఉన్నతాధికారులు పాల్గొన్నారు.

ప్రతి ఇంటా ఆనందాలు వెల్లివిరియాలి: సీఎం

‘మన సంస్కృతి సంప్రదాయాలకు, సొంత గ్రామాలపై మమకారానికి, వ్యవసాయానికి, రైతులకు మనమంతా ఇచ్చే గౌరవానికీ ప్రతీక సంక్రాంతి’ అని ముఖ్యమంత్రి జగన్‌ ట్వీట్‌ చేశారు. ‘భోగి మంటలు, రంగవల్లులు, పండగ తెచ్చే సంబరాలతో ప్రతి ఇంటా ఆనందాలు వెల్లివిరియాలని మనస్ఫూర్తిగా కోరుకుంటున్నా’ అని పేర్కొన్నారు.