ఖనిజ దిగుమతులు తగ్గించుకోవడంపై దృష్టి

బొగ్గు మంత్రిత్వశాఖ అదనపు కార్యదర్శి నాగరాజు

ఈనాడు, అమరావతి: దేశంలో ఖనిజ అవసరాల కోసం దిగుమతులు చేసుకోవడాన్ని తగ్గించడంపై కేంద్రం దృష్టిపెట్టినట్లు కేంద్ర బొగ్గు మంత్రిత్వశాఖ అదనపు కార్యదర్శి ఎం.నాగరాజు పేర్కొన్నారు. ఇందులో భాగంగా మన దేశంలో లభించే అపార ఖనిజ నిక్షేపాలను వెలికితీయడానికి ప్రోత్సహిస్తోందన్నారు. శుక్రవారం విజయవాడలోని ఏపీ ఖనిజాభివృద్ధి సంస్థ (ఏపీఎండీసీ) కార్యాలయంలో గనులశాఖ ముఖ్యకార్యదర్శి గోపాలకృష్ణ ద్వివేది, ఏపీఎండీసీ ఎండీ వెంకటరెడ్డి, ఇతర అధికారులతో ఆయన సమావేశమయ్యారు. ఈ సందర్భంగా నాగరాజు మాట్లాడుతూ.. కేంద్రం అన్ని రాష్ట్రాల్లోని మైనింగ్‌ విధానాలను పర్యవేక్షిస్తోందని, కొత్త మైనింగ్‌ ఆపరేషన్స్‌ను ప్రారంభించేందుకు ప్రోత్సహిస్తోందని తెలిపారు. ఏపీఎండీసీకి చెందిన మధ్యప్రదేశ్‌, జార్ఖండ్‌లోని బొగ్గు గనులకు సంబంధించి కేంద్రం ద్వారా అవసరమైన సహకారం అందిస్తామని తెలిపారు. ఈ సందర్భంగా వివిధ ఖనిజ తవ్వకాలు, రాష్ట్రంలో కొత్త మైనింగ్‌ విధానాలపై ఏపీఎండీసీ ఎండీ వెంకటరెడ్డి వివరించారు.