Niti Aayog CEO: మహిళలందరికీ బ్యాంకింగ్‌ సేవలు అందాలి 

 నీతి ఆయోగ్‌ సీఈఓ అమితాబ్‌ కాంత్‌

ఈనాడు, హైదరాబాద్‌: దేశంలోని ప్రతి మహిళకూ ఆర్థిక సేవలు అందేలా ప్రభుత్వ బ్యాంకులు కీలకపాత్ర పోషించాలని నీతి ఆయోగ్‌ సీఈఓ అమితాబ్‌ కాంత్‌ అన్నారు. మహిళలు ఎదుర్కొంటున్న సమస్యలపై బ్యాంకులు దృష్టి పెట్టాలని సూచించారు. డిజిటల్‌ ఆవిష్కరణలను తీసుకొచ్చేటప్పుడు.. అందులో మహిళలకు ప్రాధాన్యం ఉండేలా చూడాలని.. వారు సులభంగా వాటిని ఉపయోగించుకునేలా ఉండాలని తెలిపారు. బుధవారం బ్యాంక్‌ ఆఫ్‌ బరోడా (బీఓబీ), ఉమెన్స్‌ వరల్డ్‌ బ్యాంకింగ్‌ సంస్థ కలిసి ఉమ్మడిగా ‘ద పవర్‌ ఆఫ్‌ జన్‌ధన్‌: మేకింగ్‌ ఫైనాన్స్‌ వర్క్‌ ఫర్‌ వుమెన్‌ ఇన్‌ ఇండియా’ నివేదికను విడుదల చేశాయి. ఈ సందర్భంగా ఏర్పాటు చేసిన దృశ్యమాధ్యమ సమావేశంలో ఆయన మాట్లాడారు. జన్‌ ధన్, ఆధార్, మొబైల్‌ (జామ్‌) కలవడంతో, దేశంలో బ్యాంకింగ్‌ వ్యవస్థకు దూరంగా ఉన్న 40 కోట్ల మందీ ఆర్థిక సేవలు అందుకుంటున్నారని పేర్కొన్నారు. 10 కోట్ల మంది స్వల్ప ఆదాయం ఉన్న మహిళలకు ఆర్థిక సేవలను అందించడం ద్వారా రూ.25,000 కోట్ల డిపాజిట్లు బ్యాంకులకు లభిస్తాయని నివేదిక అంచనా వేసింది.