Gautam Adani: గుజరాత్‌లో అదానీ గ్రూప్‌ రూ.2 లక్షల కోట్ల పెట్టుబడులు

గాంధీనగర్‌: గుజరాత్‌లో వచ్చే ఐదేళ్లలో రూ.రెండు లక్షల కోట్ల పెట్టుబడులు పెడతామని అదానీ గ్రూప్‌ (Adani Group ) ఛైర్మన్‌ గౌతమ్‌ అదానీ (Gautam Adani) ప్రకటించారు. 2025 నాటికి రాష్ట్రంలో వివిధ ప్రాజెక్టుల్లో రూ.55 వేల కోట్లు వెచ్చిస్తామని వెల్లడించారు. గాంధీనగర్‌లో జరుగుతున్న ‘వైబ్రంట్‌ గుజరాత్‌ సమ్మిట్‌ 2024’ (Vibrant Gujarat Summit 2024)లో ప్రధానమంత్రి నరేంద్ర మోదీ సమక్షంలో బుధవారం ఈ ప్రకటన చేశారు.

‘‘ప్రధాని మోదీజీ.. మీరు భారతదేశ భవిష్యత్తు గురించి ఆలోచించడమే కాదు.. దాన్ని తీర్చిదిద్దుతున్నారు. మీ నాయకత్వంలో 2047 నాటికి భారత్‌ అభివృద్ధి చెందిన దేశంగా అవతరించబోతోంది. ప్రపంచ పటంలో భారత్‌ను మీరు శక్తిమంతమైన దేశంగా నిలిపారు. స్వయం సమృద్ధిగా మార్చారు. గత దశాబ్ద కాలంలో సాధించిన పురోగతి అనిర్వచనీయం. 2014 నుంచి దేశ ‘స్థూల దేశీయోత్పత్తి (GDP)’ 185 శాతం, తలసరి ఆదాయం 165 శాతం పెరిగింది. గత పదేళ్లలో తలెత్తిన భౌగోళిక రాజకీయ ఉద్రిక్తతలు, కొవిడ్‌ మహమ్మారి వంటి సవాళ్లను పరిగణనలోకి తీసుకుంటే ఈ విజయాలు అసమానమైనవి’’ అని అదానీ (Gautam Adani) వ్యాఖ్యానించారు.

గుజరాత్‌ కచ్‌ జిల్లాలోని ఖావ్‌డాలో ప్రపంచంలోనే అతిపెద్ద ఇంధన పార్కును నిర్మిస్తున్నట్లు అదానీ (Gautam Adani) తెలిపారు. 725 చదరపు కిలోమీటర్లలో ఇది విస్తరించి ఉంటుందని వెల్లడించారు. భారత్‌ను స్వయం సమృద్ధి దేశంగా మార్చడంలో భాగంగా అదానీ గ్రూప్‌ పెద్ద ఎత్తున పెట్టుబడులు పెడుతోందని వివరించారు. సౌర ఫలకలు, విండ్‌ టర్బైన్లు, హైడ్రోజన్‌ ఎలక్ట్రోలైజర్లు, హరిత అమ్మోనియా, పీవీసీ, సిమెంట్‌, రాగి ఉత్పత్తిని విస్తరిస్తున్నామని తెలిపారు. ఫలితంగా రాష్ట్రంలో లక్ష మందికి ఉపాధి లభిస్తుందని చెప్పారు.