EPF interest: ఈపీఎఫ్‌ వడ్డీ.. 8.1 శాతానికి కేంద్రం ఓకే

దిల్లీ: ఉద్యోగుల భవిష్య నిధి (EPF) డిపాజిట్లపై 8.1 శాతం వడ్డీ చెల్లించేందుకు కేంద్ర ప్రభుత్వం అంగీకరించింది. గతంలో 8.5 శాతంగా ఉన్న వడ్డీ రేటును 2021-22 ఆర్థిక సంవత్సరంలో 8.1 శాతానికి తగ్గించాలన్న ఈపీఎఫ్‌ఓ నిర్ణయానికి కేంద్ర ప్రభుత్వం ఆమోద ముద్ర వేసింది. ఈపీఎఫ్‌ఓ నిర్ణయానికి అనుగుణంగా కార్మిక మంత్రిత్వ శాఖ నుంచి ఆర్థిక మంత్రిత్వ శాఖకు ప్రతిపాదనలు వెళ్లగా.. ఆ శాఖ ఆమోదించింది. ప్రభుత్వం ఆమోదించిన నేపథ్యంలో వడ్డీ మొత్తాన్ని ఈపీఎఫ్‌ఓ 5 కోట్ల చందాదారుల ఖాతాల్లో జమ చేయనుంది.

ఈపీఎఫ్‌పై ఇంత తక్కువ వడ్డీ రేటు ఇవ్వడం 1977-78 తర్వాత ఇదే తొలిసారి కావడం గమనార్హం. ఆ ఏడాది పీఎఫ్‌పై 8 శాతం వడ్డీ ఇచ్చారు. 2018-19, 2016-17లో 8.65శాతం చొప్పున వడ్డీ జమ చేయగా.. 2013-14, 2014-15లో 8.75శాతం చొప్పున ఇచ్చారు. 2015-16లో 8.8 శాతం చొప్పున జమచేశారు. అయితే కొవిడ్‌ సమయంలో విత్‌డ్రాలు పెరగడం, చందాదారుల నుంచి జమయ్యే సొమ్ము తగ్గిపోవడంతో 2019-20 ఆర్థిక సంవత్సరానికి ఈ వడ్డీని ఏడేళ్ల కనిష్ఠానికి తగ్గించి 8.5 శాతంగా ఇచ్చారు. 2020-21లో కూడా ఇదే 8.5 శాతం వడ్డీని కొనసాగించారు.