Maruti Suzuki: మారుతీ సుజుకీ ట్రూ వాల్యూ సరికొత్త మైలురాయి

దిల్లీ: సెకెండ్‌ హ్యాండ్‌ కార్లను విక్రయించే మారుతీ సుజుకీ ట్రూ వాల్యూ (Maruti Suzuki True Value) సరికొత్త మైలు రాయిని సొంతం చేసుకుంది. గతంలో ఎన్నడూ లేని విధంగా సెకెండ్ హ్యాండ్‌ కార్ల (pre-owned car) విభాగంలో 50 లక్షల యూనిట్లను విక్రయించింది. ఈ విషయాన్ని కంపెనీ బుధవారం వెల్లడించింది. దేశీయ అతిపెద్ద కార్ల తయారీ సంస్థ మారుతీ 2001లో ఈ రంగంలో అడుగుపెట్టింది.

‘మారుతీ సుజుకీ ట్రూ వాల్యూ విభాగంలో 22 ఏళ్లు పూర్తి చేసుకుంది. భారత దేశంలో అత్యంత విశ్వసనీయమైన ప్రీ ఓన్డ్‌ బ్రాండ్‌గా అవతరించింది. ముఖ్యంగా ఈ విభాగంలో ఇప్పటివరకు 50లక్షల కస్టమర్లను సొంతం చేసుకుంది’ అని మారుతీ సుజుకీ సీనియర్‌ ఎగ్జిక్యూటివ్‌ డైరెక్టర్‌ శశాంక్‌ శ్రీవాస్తవ తెలిపారు. అయితే ప్రస్తుతం ట్రూ వాల్యూ విభాగంలో తన వ్యాపారాన్ని 281కి పైగా నగరాల్లో ప్రారంభించింది. రానున్న ఏడేళ్లలో 28 సరికొత్త మోడల్స్‌ను తీసుకురానున్నట్లు మారుతీ ఇటీవల ప్రకటించింది.