Renault-Nissan: నిస్సాన్‌లో భారీగా వాటా తగ్గించుకున్న రెనాల్ట్‌

టోక్యో: ఫ్రెంచ్‌కి చెందిన ప్రముఖ వాహన తయారీ సంస్థ రెనాల్ట్‌ ( Renault).. తన వ్యాపార భాగస్వామి నిస్సాన్‌ (Nissan) లో వాటాను భారీగా తగ్గించుకుంటోంది. రెండు సంస్థల మధ్య మైత్రిని తిరిగి సమతుల్యం చేసుకొనే ఒప్పందంలో భాగంగానే రెనాల్ట్‌ ఈ నిర్ణయం తీసుకున్నట్లు నిస్సాన్‌ వెల్లడించింది. నిస్సాన్‌లో రెనాల్ట్‌కు 43.4శాతం వాటా ఉండగా.. దాన్ని 15శాతానికి తగ్గించుకోనుంది.

రెనాల్ట్‌లో నిస్సాన్‌కు 15 శాతం వాటా ఉంది. ఈ నేపథ్యంలో నిస్సాన్‌లోనూ రెనాల్ట్‌ వాటాలను తగ్గించుకునేందుకు సిద్ధమైంది. ప్రస్తుతం నిస్సాన్‌లో 43శాతం వాటాను కలిగి ఉన్న రెనాల్ట్‌.. అందులో 28.4 శాతాన్ని వెంటనే విక్రయించకుండా తన ఫ్రెంచ్‌ ట్రస్ట్‌కు బదిలీ చేయబోతున్నట్టు తెలిపింది. ఎందుకంటే ప్రస్తుత మార్కెట్ విలువ రెనాల్ట్ ఖాతాలలో నమోదు చేసిన దాని కంటే తక్కువగా ఉంది. బోర్డు ఆమోదం పొందిన తరవాత రెండు సంస్థలు వచ్చే వారంలో కొత్త ఒప్పందంపై సంతకాలు చేయనున్నాయి.

ఈ నిర్ణయంతో రెండు కంపెనీల మధ్య చాలాకాలంగా ఉన్న విభేదాలకు పరిష్కారం లభించే అవకాశముంటుందని నిపుణులు అభిప్రాయం వ్యక్తం చేశారు. అంతే కాకుండా విద్యుదీకరణ, ఆటోమేషన్ పరిశ్రమలకు లబ్ది చేకూర్చుతుందని సంస్థల యాజమాన్యాలు భావిస్తున్నాయి.

రెనాల్ట్‌ కొత్తగా తీసుకురానున్న విద్యుత్‌ వాహన వ్యాపారం ఆంపియర్‌లో తాను కూడా పెట్టుబడులు పెట్టనున్నట్లు జపాన్‌కి చెందిన నిస్సాన్‌ తెలిపింది. కానీ, ఎంత మొత్తంలో పెట్టుబడులు ఉంటాయనే విషయాన్ని మాత్రం వెల్లడించలేదు. అయితే కొత్త ఒప్పందం ద్వారా రెండు సంస్థల మధ్య సంబంధాలు మెరుగుపడటంతో పాటు వాటాదారులకు ప్రయోజనం చేకూరుతుందని పేర్కొంది. రెనాల్ట్‌ తన కార్యకలాపాలను రెండు వ్యాపారాలుగా మార్చనున్నట్టు గతేడాది నవంబర్‌లోనే ప్రకటించింది.