వైకాపా మూకల దాడిలో గాయపడిన తెదేపా కార్యకర్త మృతి

గిద్దలూరు: వైకాపా మూకల దాడిలో తీవ్రంగా గాయపడిన తెదేపా కార్యకర్త మునయ్య మృతిచెందారు. ప్రకాశం జిల్లా గిద్దలూరు మండలం పరమేశ్వరనగర్‌లో సోమవారం ఆయనపై వైకాపా కార్యకర్తలు దాడి చేశారు. తీవ్ర గాయాలతో ఉన్న అతడిని తొలుత గిద్దలూరు నుంచి కర్నూలుకు.. ఆ తర్వాత మెరుగైన వైద్యం కోసం హైదరాబాద్‌కు తరలించారు. మునయ్య అక్కడ చికిత్స పొందుతూ మంగళవారం ఉదయం మృతి చెందారు.

అక్కసుతోనే చంపేశారు: అచ్చెన్న

చిలకలూరిపేట సమీపంలో నిర్వహించిన ‘ప్రజాగళం’ సభకు జనాన్ని తరలించాడనే అక్కసుతో మునయ్యను వైకాపా కార్యకర్తలు చంపేశారని తెదేపా రాష్ట్ర అధ్యక్షుడు అచ్చెన్నాయుడు ఆరోపించారు. తమ కార్యకర్తలపై దాడులు చేసేవారిని వదిలిపెట్టేది లేదని హెచ్చరించారు. ఈ కేసులో నిందితులపై కఠిన చర్యలు తీసుకోవాలని ఆయన డిమాండ్‌ చేశారు.