ఈత సరదా.. ఇద్దరు స్నేహితులు మృతి

చౌటుప్పల్‌ గ్రామీణం: యాదాద్రి భువనగిరి జిల్లా చౌటుప్పల్‌లో విషాదం చోటుచేసుకుంది. సరదా కోసం వచ్చి ప్రమాదవశాత్తు చెరువులో పడి ఇద్దరు యువకులు మృత్యువాతపడ్డారు. వివరాల్లోకి వెళ్తే.. హైదరాబాద్‌లోని సైదాబాద్‌కు చెందిన నాని అలియాస్‌ మాధవ్ (18), రోహన్‌(17) ఆదివారం తమ ముగ్గురు స్నేహితులతో కలిసి రెండు ద్విచక్రవాహనాలపై చౌటుప్పల్‌కు వచ్చారు. సరదా కోసం ఇక్కడి లక్కారం చెరువులో ఈతకు దిగారు. అ క్రమంలో ప్రమాదవశాత్తు నాని, రోహన్‌ చెరువులో పడి మునిగిపోతుండటం గమనించిన ఇతర స్నేహితులు స్థానికులకు సమాచారం ఇచ్చారు. స్థానికులు వచ్చి కాపాడేలోపే యువకులిద్దరూ నీటమునిగి చనిపోయారు. సమాచారం అందుకున్న స్థానిక సీఐ శ్రీనివాస్‌ ఘటనాస్థలిని పరిశీలించి వివరాలు తెలుసుకున్నారు. కేసు నమోదు చేసి దర్యాప్తు చేస్తున్నట్లు సీఐ చెప్పారు.