వాగు దాటి వైద్యం అందించి.!

తాడు సహాయంతో వాగు దాటుతున్న ఏజెన్సీ జిల్లా ఉపవైద్యాధికారి కుడ్మెత మనోహర్‌, వైద్య సిబ్బంది

ఉట్నూరు గ్రామీణం, న్యూస్‌టుడే : ఏజెన్సీలోని మారుమూల గ్రామాల ప్రజలు వ్యాధుల బారిన పడకుండా వైద్య సిబ్బంది చూడాలని ఏజెన్సీ జిల్లా ఉపవైద్యాధికారి కుడ్మెత మనోహర్‌ సూచించారు. కొన్ని రోజులగా కురుస్తున్న వర్షాలతో ఉట్నూరు మండలం జెండాగూడకు వెళ్లే మార్గంలో చెరువుగూడ సమీపాన ఉన్న వాగు నీటితో ప్రవహిస్తోంది. గురువారం ఆయన డిప్యూటీ డీఎంహెచ్‌ఓ విజయ్‌కుమార్‌, దంతనపల్లి పీహెచ్‌సీ వైద్యాధికారి అనురాధ వైద్య సిబ్బందితో కలిసి జెండాగూడకు వెళ్లే దారిలో ఉన్న వాగును తాడు సహాయంతో దాటారు. అక్కడి ప్రజలకు వైద్య పరీక్షలు నిర్వహించి మందులిచ్చారు. వ్యాధుల బారిన పడకుండా తీసుకోవాల్సిన జాగ్రత్తలు వాటి నివారణపై అవగాహన కల్పించారు. అనంతరం మూడు రోజుల కిందట మృతి చెందిన కేజీబీవీ విద్యార్థి కుటుంబాన్ని పరామర్శించారు. పీవీటీజీ ఏపీఓ భాస్కర్‌ వైద్య సిబ్బంది శ్రీనివాస్‌, నూర్‌సింగ్‌, గణేశ్‌ కుమారి, రాంబాయి తదితరులు పాల్గొన్నారు.