Andhra News: మేమింతే... మారమంతే

చోదకుడి చాకచక్యంతో తప్పిన ప్రమాదం

టీకేఎంపురం సమీపంలో స్టీరింగ్‌ రాడ్‌ విరిగిపోవడంతో ఆగిన ఆర్టీసీ బస్సు

వెదురుకుప్పం: తరచూ ఎక్కడో ఒకచోట బస్సు ఆగిపోతున్నా.. ఏపీపీటీడీ అధికారుల్లో ఏమాత్రం చలనం లేదనేందుకు ఆదివారం నిలిచిపోయిన బస్సు నిదర్శనం. ఉదయం తిరుపతి నుంచి పళ్లిపట్టుకు 20 మంది ప్రయాణికులతో బయలుదేరిన బస్సు మార్గమధ్యలో పచ్చికాపల్లంలో ఆగడంతో ప్రయాణికులు దిగారు. మళ్లీ బయలుదేరి కార్వేటినగరం వైపు వెళుతుండగా టీకేఎంపురం దారి సమీపంలో స్టీరింగ్‌ రాడ్‌ విరిగిపోవడంతో ఎడమవైపు వెళుతున్న బస్సు ఒక్కసారిగా కుడివైపునకు పోతున్నట్లు చోదకుడు గుర్తించాడు. వెంటనే అప్రమత్తమై బస్సును నియంత్రించేలోగా ఏం జరుగుతుందో అర్ధం కాక ప్రయాణికులు కేకలు వేశారని ప్రత్యక్ష సాక్షులు తెలిపారు. రహదారులపై గోతులు ఉండటం, కాలం చెల్లిన బస్సులతో తీవ్ర ఇబ్బందులు పడుతున్నామని, చోదకుడు అప్రమత్తం కాకుంటే ప్రమాదం జరిగి ఉండేదని, వెంటనే మరమ్మతులు చేయాలని ఆయా ప్రాంతాల ప్రజలు కోరుతున్నారు.