గుట్టచప్పుడు కాకుండా..

డీకేటీ పట్టాల పేరుతో చదును పనులు
ఎమ్మెల్యే చెవిరెడ్డి ఇలాకాలో వైకాపా నేతల ఆక్రమణ పర్వం

ఇప్పటికే చదును చేసిన గుట్ట ప్రాంతం

ఈనాడు-తిరుపతి: అధికార యంత్రాంగం మొత్తం ఎన్నికల విధుల్లో నిమగ్నం కావడంతో వైకాపా నేతలు అక్రమాలకు తెగబడుతున్నారు. తమ కనుచూపు మేరలో కనిపించిన ప్రభుత్వ భూములను కబ్జా చేయడంతోపాటు గుట్టలను చదును చేసి ఆక్రమిస్తున్నారు. ఇప్పటికే చంద్రగిరి నియోజకవర్గంలోని రామచంద్రాపురం మండలంలోని అనేక ప్రాంతాల్లోని గుట్టలను కొల్లగొట్టిన వైకాపా నేతలు ఇప్పుడు తాజాగా ఇదే మండలంలోని అనుపల్లి పంచాయతీ పరిధిలోని బొప్పరాజుపల్లెలో గుట్టలను జేసీబీ ద్వారా చదును చేస్తున్నారు. ఇక్కడ కొందరు రైతులకు 1982లో డీకేటీ పట్టాలిచ్చారు. అప్పటి నుంచి ఆభూముల్లోకి వారెవరూ వెళ్లడం లేదు. జాతీయ రహదారికి సమీపంలో ఉండటంతో చంద్రగిరి ప్రాంతానికి చెందిన ఎమ్మెల్యే చెవిరెడ్డి భాస్కర్‌రెడ్డి అనుచరులు ఇద్దరు వైకాపా ముఖ్య నేతల కన్ను ఈ భూములపై పడింది. బొప్పరాజుపల్లెలో డీకేటీ భూములతో పాటు పక్కనున్న గుట్టలను సైతం ఆక్రమిస్తున్నారు. కొన్ని రోజులుగా జేసీబీలతో చదును చేస్తున్నారు.

డీకేటీ కొంత.. ఆక్రమణ మరింత

ఇక్కడ 16 ఎకరాలకు మాత్రమే డీకేటీ పట్టాలు ఇచ్చారని తెలుస్తోంది. కానీ 30 ఎకరాల మేరకు చదును చేస్తున్నారు. ఈ స్థలాల ఆక్రమణకు ముందు నుంచే వైకాపా నేతలు పావులు కదిపారు. 2023లో కొన్ని భూములను అసైన్‌మెంట్‌ జాబితా నుంచి తొలగించారు. రైతుల నుంచి కొంత భూమిని కొని వారి అధీనంలోకి తీసుకున్నట్లు తెలుస్తోంది. మిగిలిన భూములకు కొంత ముట్టజెప్పి, ఇక్కడి గుట్టలను ఆక్రమించుకునేందుకు జేసీబీలకు పనిచెప్పారు.

కి.మీ. మేరకు రహదారి

బొప్పరాజుపల్లెకు వెళ్లే ప్రధాన రహదారిని ఆనుకుని గుట్ట ప్రాంతం వెనుక భాగాన్ని జేసీబీలతో చదును చేస్తున్నారు. ఈ ప్రాంతానికి వెళ్లేందుకు దారి లేకపోవడంతో జేసీబీలతో కి.మీ. మేరకు రహదారి ఏర్పాటు చేసుకున్నారు.