నామినేషన్ల పర్వానికి వేళాయే

నేటి నుంచి స్వీకరణ

కలెక్టరేట్‌లో ఏర్పాటు చేసిన హెల్ప్‌డెస్క్‌

తిరుపతి(కలెక్టరేట్‌): సార్వత్రిక ఎన్నికల సమరానికి అడుగులు పడ్డాయి. నోటిఫికేషన్‌ ప్రచురణ, నామినేషన్ల స్వీకరణకు అధికారులు అన్ని ఏర్పాట్లు చేశారు. జిల్లా పరిధిలోని ఒక లోక్‌సభ స్థానం, ఏడు శాసనసభ స్థానాలకు గురువారం నుంచి నామినేషన్ల స్వీకరణకు అన్ని ఏర్పాట్లు పూర్తిచేసినట్లు కలెక్టర్‌ ప్రవీణ్‌కుమార్‌ ఓ ప్రకటనలో తెలిపారు. ఉదయం 11 గంటల నుంచి మధ్యాహ్నం మూడు గంటల వరకు సంబంధిత ఆర్వో కార్యాలయాల్లో వాటిని స్వీకరిస్తారన్నారు.

• కలెక్టరేట్‌లో నామినేషన్లు దాఖలు చేసే అభ్యర్థుల అనుమానాలను నివృత్తి చేసేందుకు హెల్ప్‌డెస్క్‌ను ఏర్పాటు చేశారు. నామినేషన్లకు సంబంధించి ఏదైనా సమాచారం కావాలంటే కేంద్రాన్ని సంప్రదించాలని సంబంధిత అధికారులు విజ్ఞప్తి చేశారు.

ఈసారి ఆన్‌లైన్‌లోనూ

• సువిధ యాప్‌ ద్వారా ఈసారి ఆన్‌లైన్‌లోనూ నామపత్రాలు దాఖలు చేయవచ్చు. ఆయా ప్రతులను ఆర్‌వో కార్యాలయంలో అందజేయాలి.
• గుర్తింపు పొందిన రాజకీయ పార్టీల అభ్యర్థులు పార్టీలు జారీచేసే ఏ, బీ ఫారాలను ఉప సంహరణ గడువులోగా అందజేయాలి. 
• విద్యార్హతలు, నేరచరిత్ర, ఆస్తులు, అప్పులకు సంబంధించి అఫిడవిట్లు నామపత్రంతో పాటు జతచేయాలి. నేర చరిత్ర కలిగి, కోర్టు కేసులు ఎదుర్కొనే వారు ఆయా వివరాలు, కేసుల సంఖ్య ప్రస్తావిస్తూ పత్రికల్లో మూడుసార్లు ప్రకటనలు ఇవ్వాలి.
• ఎమ్మెల్యే అభ్యర్థి రూ.40 లక్షలు, ఎంపీ అభ్యర్థి రూ.95 లక్షలు ఖర్చు చేయవచ్చు.