అర్హులందరికీ సంక్షేమ ఫలాలు

లబ్ధిదారులకు చెక్కు అందజేస్తున్న మంత్రి కన్నబాబు, ప్రజాప్రతినిధులు

కాకినాడ కలెక్టరేట్‌: జిల్లాలో అర్హులందరికీ సంక్షేమ ఫలాలు అందజేస్తున్నట్లు మంత్రి కన్నబాబు పేర్కొన్నారు. మంగళవారం వైఎస్సార్‌ ఈబీసీ నేస్తం పథకాన్ని సీఎం జగన్‌ తన విడిది కార్యాలయం నుంచి ప్రారంభించారు. కలెక్టరేట్‌ నుంచి మంత్రి కన్నబాబు, ఎంపీ పిల్లి సుభాష్‌చంద్రబోస్‌, జడ్పీ ఛైర్మన్‌ వేణుగోపాలరావు, కలెక్టర్‌ సి.హరికిరణ్‌, జేసీ భార్గవ్‌తేజ, మేయర్‌ శివప్రసన్న, కుడా ఛైర్‌పర్సన్‌ రాగిరెడ్డి చంద్రకళాదీప్తి, కాకినాడ స్మార్ట్‌సిటీ కార్పొరేషన్‌ ఛైర్మన్‌ అల్లి రాజబాబు, అధికారులు, లబ్ధిదారులు హాజరయ్యారు. మంత్రి మాట్లాడుతూ, అగ్రవర్ణ పేదల్లో ఆర్థికంగా వెనుకబడిన కులాలకు ప్రభుత్వం ధైర్యాన్నిచ్చిందన్నారు. కలెక్టర్‌ హరికిరణ్‌ మాట్లాడుతూ, ఈబీసీ నేస్తం పథకంలో జిల్లాలో 45-60 ఏళ్లలోపు 29,406 మంది మహిళలకు తొలి విడతగా రూ.44.10 కోట్ల ఆర్థిక సాయాన్ని ఒక్కొక్కరికీ రూ.15 వేల చొప్పున వారి బ్యాంకు ఖాతాలకు జమ చేసినట్లు పేర్కొన్నారు. అనపర్తికి చెందిన కొవ్వూరి లక్ష్మి, కాకినాడకు చెందిన కోడూరి సూర్యకుమారి వర్చువల్‌లో సీఎంతో మాట్లాడారు. కార్యక్రమంలో బీసీ కార్పొరేషన్‌ ఈడీ ఎస్‌వీఎస్‌ సుబ్బలక్ష్మి తదితరులు పాల్గొన్నారు.