అంతా... మా ఇష్టం

పొన్నూరు పురపాలక సంఘ  కార్యాలయంలో రిటర్నింగ్‌ అధికారి
గుంటూరు -బాపట్ల ప్రధాన  రహదారిలో వాహనదారుల ఇబ్బందులు

పొన్నూరు జీబీసీ రహదారిలో నిలిచిపోయిన వాహనాలు

పొన్నూరు, న్యూస్‌టుడే : పొన్నూరు రిటర్నింగ్‌ కార్యాలయం మార్పు చేయడంపై విమర్శలు వస్తున్నాయి. ఎన్నికల అధికారులు అవగాహన లోపంతో తీసుకున్న నిర్ణయంతో గుంటూరు-బాపట్ల ప్రధాన రహదారిలో రాకపోకలు సాగించే వాహనదారులు ఇబ్బంది పడుతున్నారు. పొన్నూరు అసెంబ్లీ స్థానం 1972 సంవత్సరంలో ఏర్పడింది. ఇక్కడ పోటీ చేసే అభ్యర్థులు పొన్నూరు తహశీల్దారు కార్యాలయంలోని రిటర్నింగ్‌ అధికారులకు నామినేషన్లు పత్రాలు అందజేసేవారు. ఆ మార్గంలో వాహనాల రాకపోకలు జరగకుండా పోలీసులు బారికేడ్లు ఏర్పాటు చేసేవారు. ఆ సమయంలో వాహనాలను షరాఫ్‌ బజార్‌, తెలగపాలెం మీదుగా గుంటూరు-బాపట్ల ప్రధాన రహదారిలోకి వాహనాలు రావడంతో ఎవరికీ ఇబ్బంది కలిగేది కాదు. ప్రస్తుతం ఎన్నికల నేపథ్యంలో తహశీల్దారు కార్యాలయం నుంచి పొన్నూరు పురపాలక సంఘ కార్యాలయానికి మార్చారు. రిటర్నింగ్‌ అధికారి కార్యాలయం గుంటూరు-బాపట్ల ప్రధాన మార్గంలో ఉండటంతో వాహనాలను మరో రహదారిలోకి మళ్లించే అవకాశం లేకుండా పోయింది.

ఎన్నికల నిబంధనల ప్రకారం గుంటూరు-బాపట్ల ప్రదాన రహదారిలో బారికేడ్లు ఏర్పాటు చేశారు. బారికేడ్లు నిర్మాణ పనులు సక్రమంగా చేయకపోవడంతో ఒక్కసారిగా ఒక వైపు కూలిపోయాయి. నామినేషన్లకు వివిధ రాజకీయ పార్టీల నుంచి వాహనాల్లో ఎక్కువ మంది హాజరవుతున్నారు. గుంటూరు-బాపట్ల ప్రధాన రహదారి కావడంతోపాటు వాహనాల రద్దీ పెరగడంతో ట్రాఫిక్‌ సమస్య ఏర్పడింది. ఎండలో ఉండలేక వాహనదారులు అనేక ఇబ్బందులు పడ్డారు. రిటర్నింగ్‌ అధికారి కార్యాలయం మార్చాల్సిన అవసరం ఏమి వచ్చిందని పలువురు ప్రశ్నిస్తున్నారు.

గుంటూరు-బాపట్ల ప్రధాన రహదారిలో కూలిపోయిన బారికేడ్లు