కార్మిక సంఘాలు చతికిలపడుతున్నాయి: హెచ్‌ఎంఎస్‌

ఖైరతాబాద్‌, న్యూస్‌టుడే: దేశంలో కార్మికులకోసం కొట్లాడాల్సిన కార్మిక సంఘాలు చతికిలపడుతున్నాయని హింద్‌ మజ్దూర్‌ సభ (హెచ్‌ఎంఎస్‌) రాష్ట్ర అధ్యక్షుడు రియాజ్‌ అహ్మద్‌ అన్నారు. హెచ్‌ఎంఎస్‌ పోరాటమే ఊపిరిగా ముందుకు సాగుతుందన్నారు. సోమాజిగూడ ప్రెస్‌క్లబ్‌లో శుక్రవారం హెచ్‌ఎంఎస్‌ గ్రేటర్‌ హైదరాబాద్‌ నూతన కార్యవర్గాన్ని ప్రకటించారు. ఈ సందర్భంగా ఆయన మాట్లాడుతూ.. పలు కార్మిక సంఘాలు రాజకీయ పార్టీల నీడన బతుకుతూ కార్మికుల సమస్యల్ని విస్మరిస్తున్నాయని విమర్శించారు. రాష్ట్ర కార్యదర్శి రెబ్బ రామారావు మాట్లాడుతూ ఫిబ్రవరి 23, 24 జరుగనున్న దేశ వ్యాప్త సమ్మెలో పాల్గొని విజయవంతం చేస్తామని ప్రకటించారు. కార్యవర్గంలో అధ్యక్షుడిగా కె.రాజు, ఉపాధ్యక్షులుగా ఎ.హరి, సి.మహేష్‌, జె.అశోక్‌, కె.నర్సింగరావు, ఎండీ అక్బర్‌, ప్రధాన కార్యదర్శిగా మహమ్మద్‌ అంజద్‌, కార్యదర్శులుగా నవీన్‌ కాంత్‌, టి.గీతారాణి, సి.జనార్దన్‌, డి.పద్మ, బాబు, కోశాధికారిగా ఎ.సుధాకర్‌ ఉన్నారు.