Hyderabad: ప్రేయసి పెళ్లి ఫొటోలు చూసి ఆత్మహత్య.. మృతుడి జేబులో మంగళసూత్రం

గణేశ్‌

హయత్‌నగర్‌, న్యూస్‌టుడే : జీవితాంతం తోడుంటానని మాటిచ్చిన ప్రేయసి మరొకరితో ఏడడుగులు నడిచిందని తెలిసి తల్లడిల్లిపోయాడు. ఆపై వారి వివాహ చిత్రాలు కంటపడడంతో ప్రేమించిన గుండె తట్టుకోలేకపోయింది. తాను కట్టాలనుకున్న తాళిని జేబులో పెట్టుకొని తరువుకు ఉరివేసుకుని తనువు చాలించాడు. ఈ ఘటన హయత్‌నగర్‌ ఠాణా పరిధిలో జరిగింది. పందిగొట్ల లక్ష్మయ్య, అనంతమ్మ దంపతులు రంగారెడ్డి జిల్లా తుర్కయంజాల్‌ మున్సిపాలిటీ పరిధిలోని మునగనూరు గ్రామం వినాయకనగర్‌ కాలనీలో ముగ్గురు కుమారులతో కలిసి నివాసముంటున్నారు. వీరి రెండో కుమారుడైన గణేశ్‌(23) లారీ డ్రైవర్‌. స్థానికంగా నివాసముంటున్న ఓ యువతిని ఏడాదిగా ప్రేమిస్తూ.. పెళ్లి చేసుకోవాలని భావించాడు. ఆమెకు తల్లిదండ్రులు ఇటీవలే మరో యువకుడితో వివాహం జరిపించారు. ఆ పెళ్లి ఫొటోలను ఆమె.. గణేశ్‌కి వాట్సప్‌లో పంపింది. అవిచూసి తీవ్ర మనస్తాపానికి గురై.. సోమవారం రాత్రి ఇంట్లోంచి వెళ్లిపోయాడు. మంగళవారం ఉదయం మునగనూరు శివారులో ఓ చెట్టుకు ఉరేసుకొని వేలాడుతూ ఉండటాన్ని స్థానికులు గుర్తించి పోలీసులకు తెలిపారు. అతని జేబులో మంగళసూత్రం ఉంది. పోలీసులు కేసు నమోదు చేశారు.