చిరువ్యాపారులకు.. వీధిబజార్‌

హైటెక్‌సిటీ రైల్వేస్టేషన్‌ చెంత ఏర్పాట్లు

వంతెన కింద సిద్ధమవుతున్న స్టాళ్లు

ఈనాడు - హైదరాబాద్‌: చిరు, తోపుడుబల్ల వ్యాపారులకు బల్దియా మార్గం చూపుతోంది. అందుకు హైటెక్‌సిటీ రైల్వే స్టేషన్‌ చెంత.. వంతెన కింద ఉన్న స్థలాన్ని కేటాయించింది. కూకట్‌పల్లి మోడల్‌ రైతుబజారు నిర్మిస్తున్నప్పుడు వంతెన కింద తాత్కాలికంగా రైతుబజారును ఏర్పాటు చేశారు. ఇక్కడ మూడేళ్లు రైతుబజారు నడిచింది. భూగర్భ కేబుళ్లు వేసి.. డిజిటల్‌ కాంటాలు, ఇంటర్నెట్‌ కనెక్షన్‌ కూడా ఇచ్చారు. అయితే అవేవీ అమలవ్వలేదు. తాత్కాలిక మార్కెట్‌ కదా అని ఎవరూ పట్టించుకోలేదు. కాని రైతుబజార్లకు ఉద్దేశించిన ప్లాట్‌ఫామ్‌లను ఇప్పుడు చిరు వ్యాపారులకు వినియోగించాలని స్థానిక ఎమ్మెల్యే ప్రతిపాదించడంతో కార్యక్రమం ముందుకెళ్తోంది.

ఎకరానికి పైగా స్థలంలో..

హైటెక్‌సిటీ రైల్వే వంతెన కింద ఎకరానికి పైగా స్థలం ఉంది. ఇక్కడ 250 రైతుబజారు దుకాణాలు నడిచేవి. తాత్కాలికంగా ఏర్పాటు చేసిన రైతుబజారును కూకట్‌పల్లిలో కొత్తగా నిర్మించిన మోడల్‌ రైతుబజారుకు తరలించారు. దీంతో ఇక్కడ ఖాళీ అయ్యింది. ఇక్కడ 300 వరకూ తోపుడు బళ్లను పెట్టుకొని ‘స్ట్రీట్‌ ఫుడ్‌’ సెంటర్‌గా మార్చడానికి అవకాశం ఉంది. ఇందుకు కొంత అద్దెను కూడా వసూలు చేసే అవకాశం ఉంది. దీంతో వీధి పక్కన వ్యాపారాలు చేసుకునే తోపుడుబళ్లవారు వెనుకా ముందు అవుతున్నారని పలువురు ముందుకు వచ్చిన వ్యాపారులు చెబుతున్నారు. అద్దె సాధారణంగా ఉంటే.. అందరూ ఒకే దగ్గర ఉన్నప్పుడు వ్యాపారం సాఫీగా.. సాగుతుందని యాదగిరి అనే చిరు వ్యాపారి చెబుతున్నారు. కొంతమంది ఇప్పటికే వ్యాపారాలు కొనసాగిస్తున్నారు. ఏప్రిల్‌ నాటికి ఈ స్ట్రీట్‌ ఫుడ్‌ కేంద్రం అందుబాటులోకి వస్తుందని స్థానిక బల్దియా అధికారులు చెబుతున్నారు.