‘యోగా మహోత్సవ్’.. ఏర్పాట్లను పరిశీలించిన కిషన్‌రెడ్డి

హైదరాబాద్‌: అంతర్జాతీయ యోగా దినోత్సవం (జూన్‌ 21) సందర్భంగా 25 రోజుల కౌంట్‌డౌన్‌తో సికింద్రాబాద్ పరేడ్ గ్రౌండ్స్‌లో శనివారం యోగా మహోత్సవ్ చేయబోతున్నామని కేంద్ర మంత్రి కిషన్ రెడ్డి వెల్లడించారు. జూన్ 21న అంతర్జాతీయ యోగా దినోత్సవం కోసం ఏర్పాట్లు చేస్తున్నట్లు చెప్పారు. ప్రపంచంలోనే మొదటిసారిగా యోగా మహోత్సవ్ కార్యక్రమాన్ని హైదరాబాద్‌లో నిర్వహిస్తున్నామన్నారు. రేపు ఉదయం వేల మంది యోగా గురువుల ఆధ్వర్యంలో ‘యోగా మహోత్సవం’ ప్రారంభమవుతుందన్నారు. రాష్ట్ర గవర్నర్‌ తమిళిసై సౌందరరాజన్‌, మంత్రులు, సినిమా ఆర్టిస్ట్‌లు, క్రీడాకారులను కార్యక్రమానికి ఆహ్వానించినట్లు కిషన్‌రెడ్డి చెప్పారు. ఈ మేరకు పరేడ్‌ గ్రౌండ్స్‌లో యోగా మహోత్సవ్‌ నిర్వహణకు జరుగుతున్న ఏర్పాట్లను కిషన్‌రెడ్డి పరిశీలించారు.