కాంగ్రెస్‌, భారాస కుమ్మక్కు

భాజపా జాతీయ ప్రధాన కార్యదర్శి బండి సంజయ్‌

 మాట్లాడుతున్న బండి సంజయ్‌

 తెలంగాణచౌక్‌(కరీంనగర్‌), న్యూస్‌టుడే: రాబోయే పార్లమెంట్‌ ఎన్నికల్లో ఏ సర్వే చూసినా కరీంనగర్‌ లోక్‌సభ స్థానంలో భాజపా భారీ మెజార్టీతో గెలుస్తుందని చెబుతున్నాయని, కాంగ్రెస్‌, భారాస కుమ్మకై తనను ఓడించేందుకు కుట్ర చేస్తున్నాయని ఎంపీ, పార్టీ జాతీయ ప్రధాన కార్యదర్శి బండి సంజయ్‌కుమార్‌ అన్నారు. మంగళవారం కరీంనగర్‌లో పార్లమెంట్‌ నియోజకవర్గ పరిధిలోని మండలాల ఇన్‌ఛార్జులతో సమావేశమై దిశానిర్దేశం చేశారు. స్థానిక సమస్యలపై ప్రత్యేక దృష్టి సారించడంతోపాటు వాటి పరిష్కారంలో గత భారాస, ప్రస్తుత కాంగ్రెస్‌ ప్రభుత్వాల వైఫల్యాలు ఎండగట్టాలని పార్టీ శ్రేణులకు పిలుపునిచ్చారు. నరేంద్రమోదీ వర్సెస్‌ రాహుల్‌గాంధీగా పార్లమెంట్‌ ఎన్నికలు జరగబోతున్నాయని, ఇదే అంశాన్ని ఇంటింటికి తీసుకెళ్లాలని కోరారు. ఆరు గ్యారంటీల అమల్లో కాంగ్రెస్‌ ప్రభుత్వ వైఫల్యాన్ని ఊరూరా ప్రస్తావించాలన్నారు. పార్టీలో చేరికలపై ప్రత్యేక దృష్టి పెట్టాలని, బూత్‌ కమిటీలను పటిష్ఠం చేయాలన్నారు. అభివృద్ధికి తాను తీసుకొచ్చిన నిధులను ప్రస్తావించాలని సూచించారు. సమావేశంలో భాజపా రాష్ట్ర అధికార ప్రతినిధి సి.హెచ్‌.విఠల్‌, జిల్లా ఇన్‌ఛార్జి మీసాల చంద్రయ్య, పార్లమెంట్‌ నియోజకవర్గ కన్వీనర్‌ బోయినిపల్లి ప్రవీణ్‌రావు, సిద్దిపేట జిల్లా అధ్యక్షుడు మోహన్‌రెడ్డి తదితరులు పాల్గొన్నారు.