అమ్మ కోసం వెళ్లి అనంతలోకాలకు

పాఠశాల బస్సు కింద పడి చిన్నారి దుర్మరణం

మల్యాల, న్యూస్‌టుడే: కుమారుడిని పాఠశాల(ప్రైవేటు) బస్సు ఎక్కించేందుకు తల్లి వెళ్లగా.. ఆమె కోసం వెళ్లిన చిన్నారి ప్రమాదవశాత్తు అదే బస్సు కింద పడి దుర్మరణం చెందిన సంఘటన గ్రామంలో తీవ్ర విషాదం నింపింది. ఎస్సై అబ్దుల్‌ రహీం తెలిపిన వివరాల ప్రకారం.. జగిత్యాల జిల్లా మల్యాల మండలంలోని మద్దుట్ల గ్రామానికి చెందిన రజాక్‌-హసీనా దంపతులకు కుమారుడు, కుమార్తె ఉన్నారు. మంగళవారం ఉదయం కుమారుడు సాజిల్‌ను పాఠశాల బస్సు ఎక్కించేందుకు తల్లి హసీనా వెళ్లింది. ]

]

తల్లి వెనుకే 18 నెలల కుమార్తె అరిబా బస్సు ముందుకు వెళ్లింది. డ్రైవర్‌ గమనించక వాహనాన్ని ముందుకు కదిలించడంతో చిన్నారి తలపై నుంచి వెనుక చక్రం వెళ్లింది. తీవ్ర గాయాలైన కుమార్తెను ఎలాగైనా బతికించుకునేందుకు తండ్రి రజాక్‌ వెంటనే ఆటోలో జగిత్యాల ఆసుపత్రికి తరలించాడు. పరీక్షించిన వైద్యులు అప్పటికే మృతిచెందినట్లు తెలిపారు. దీంతో కుటుంబ సభ్యుల రోదనలు మిన్నంటాయి. చిన్నారి మృతికి కారణమైన బస్సు డ్రైవర్‌ రవిపై కేసు నమోదు చేసినట్లు ఎస్సై తెలిపారు.