ఖమ్మం జిల్లాలో 14,696.. భద్రాద్రిలో 12,211

ఈనాడు డిజిటల్‌- కొత్తగూడెం, న్యూస్‌టుడే, ఖమ్మం నగరం: లోక్‌సభ ఎన్నికల నేపథ్యంలో ఓటరు నమోదు క్రతువు సోమవారంతో ముగిసింది. 2024 ఏప్రిల్‌ 1 నాటికి 18 ఏళ్లు పూర్తి చేసుకున్న వారందరూ ఓటరుగా నమోదు చేసుకునే అవకాశాన్ని ఎన్నికల సంఘం కల్పించింది. ఓటరు అనుబంధ జాబితాను ఈనెల 25న వెల్లడించనుంది. ఈ జాబితాలో చోటుదక్కిన వారందరూ మే 13న ఓటుహక్కు వినియోగించుకునే అవకాశం ఉంటుంది.

కొనసాగుతున్న పరిశీలన ప్రక్రియ.. నూతనంగా ఓటు నమోదుకు ఫాం-6, ఓటరు చిరునామా మార్చుకోవటానికి ఫాం-8 ద్వారా దరఖాస్తు చేసుకోవాలని ఎన్నికల సంఘం సూచించింది. ఈ ఏడాది జనవరి 23న ఈ ప్రక్రియ ప్రారంభమైంది. ఈ రెండు అంశాలపై ఖమ్మం జిల్లాలో 14,696 మంది, భద్రాద్రి జిల్లాలో 12,211 మంది అర్జీలు సమర్పించారు. వీటిని అధికారులు పరిశీలిస్తున్నారు. అర్హత లేని దరఖాస్తులను తిరస్కరిస్తున్నారు. అర్హులకు ఓటుహక్కు కల్పించే పనిలో నిమగ్నమయ్యారు.