బంతి విసిరితె విజయమే

త్రోబాల్‌లో జాతీయస్థాయికి ఎంపికైన విద్యార్థులు

నంద్యాల పాతపట్టణం, న్యూస్‌టుడే : గ్రామీణ ప్రాంతాలకు చెందిన విద్యార్థులు త్రోబాల్‌ క్రీడలో ప్రతిభ చూపుతున్నారు. ఆటపై ఆసక్తితో పట్టుదలగా నేర్చుకున్నారు. తక్కువ కాలంలోనే రాష్ట్రస్థాయిలో రాణించి జాతీయస్థాయికి ఎంపికయ్యారు. వీరు బంతి విసిరితే జట్టు గెలుపు బాట పట్టాల్సిందే. ఆటలో నైపుణ్యం చూపుతూ జట్టులోనే తమ స్థానాన్ని పదిలం చేసుకున్నారు.

పూజిత.. గెలుపు ఘనత

నందిపల్లె గ్రామానికి చెందిన రంగేశ్‌, రమాదేవి దంపతుల కుమార్తె పూజిత. ప్రస్తుతం నంద్యాల పట్టణంలో 8వ తరగతి చదువుతోంది. చిన్నప్పటి నుంచి క్రీడలపై ఇష్టం ఉండటంతో పాఠశాలలో వ్యాయామ ఉపాధ్యాయుడు సుబ్బారావు దగ్గర త్రోబాల్‌లో 6వ తరగతి నుంచి శిక్షణ తీసుకుంటోంది. గత రెండేళ్ల నుంచి జిల్లాస్థాయిలో రాణించింది. 2022 డిసెంబరు నెలలో నంద్యాలలో నిర్వహించిన ఎస్‌జీఎఫ్‌ అండర్‌-14లో క్రీడల్లో సత్తాచాటి జిల్లా జట్టుకు ఎంపికైంది. ప్రస్తుతం జరుగుతున్న రాష్ట్రస్థాయి పోటీల్లో జిల్లా జట్టు విజయంలో కీలకపాత్ర పోషిస్తోంది. ఈ విద్యార్థిని ప్రతిభను గుర్తించి జాతీయస్థాయికి ఎంపిక చేశారు.

శభాష్‌.. శరత్‌

టంగుటూరు గ్రామానికి చెందిన భాస్కర్‌రెడ్డి, లక్ష్మిదేవి దంపతుల కుమారుడు శరత్‌కుమార్‌రెడ్డి. ప్రస్తుతం నంద్యాలలో 9వ తరగతి చదువుతున్నాడు. పాఠశాలలో శిక్షణ పొంది రాష్ట్రస్థాయిలో రాణిస్తున్నాడు. 2021- 22 సంవత్సరంలో నిర్వహించిన పెద్దిరెడ్డి తిమ్మారెడ్డి స్మారక జిల్లాస్థాయి త్రోబాల్‌ పోటీల్లో రాణించి జట్టు విజయంలో కీలకపాత్ర పోషించాడు. గతేడాది డిసెంబరులో జరిగిన పోటీల్లో ప్రతిభ చూపి అండర్‌-14 జిల్లా జట్టుకు ఎంపికయ్యాడు. ప్రస్తుతం గురురాజ పాఠశాల మైదానంలో నిర్వహిస్తున్న ఎస్‌జీఎఫ్‌ రాష్ట్రస్థాయి పోటీల్లో ప్రతిభ చూపడం ద్వారా జాతీయ స్థాయి పోటీలకు ఎంపికయ్యాడు.