ఎమ్మెల్యే వస్తున్నారని.. ఉపాధి పనులు బంద్‌

ఆదోని గ్రామీణం, న్యూస్‌టుడే: ఆదోని మండలం అరేకల్‌లో బుధవారం ఉపాధి పనులు చేపట్టలేదు. ఆదోని ఎమ్మెల్యే సాయిప్రసాద్‌రెడ్డి ఎన్నికల ప్రచారానికి వస్తున్నారని, ఉపాధి పనులు బంద్‌ చేసినట్లు గ్రామస్థులు తెలిపారు. గ్రామానికి చెందిన ఉపాధి పథకం క్షేత్ర సహాయకుడు గోపాల్‌ ప్రచారంలో పాల్గొనడం గమనార్హం. విషయం బయటికి పొక్కడంతో.. కూలీలు పనులకు హాజరయ్యారని చూపించినట్లు తెలుస్తోంది. ఈ విషయాన్ని ‘న్యూస్‌టుడే’ ఆదోని ఉపాధి ఏపీవో కాలిక్‌తో ప్రస్తావించగా.. శ్రీరామ నవమి పండగ ఉండటంతో చాలా మంది పనులకు హాజరు కాలేదన్నారు. ఉపాధి పనులకు వెళ్లకుండా తన కోసం వచ్చిన కూలీలకు ఎమ్మెల్యే సాయిప్రసాద్‌రెడ్డి కృతజ్ఞతలు తెలపడం గమనార్హం.