ఉపాధి పోయిందని ఉసురు తీసుకుని..

రైలు కిందపడి ఆటో మెకానిక్‌ ఆత్మహత్య

షాద్‌నగర్‌ పట్టణం, న్యూస్‌టుడే: ఉపాధి పోయిందన్న మనస్తాపంతో ఓ వ్యక్తి రైలు కింద పడి ఆత్మహత్య చేసుకున్నాడు. షాద్‌నగర్‌ పట్టణ శివారులో ఏబీ విల్లాస్‌ సమీపంలో రైలుపట్టాలపై తల, మొండెం వేర్వేరుగా పడి ఉన్న ఓ మృతదేహాన్ని శనివారం పోలీసులు గుర్తించారు. అతని జేబులో దొరికిన కార్డులో ఉన్న వివరాల ఆధారంగా వికారాబాద్‌ జిల్లా పరిగి నియోజకవర్గం కుల్కచర్ల మండలం రాంపూర్‌కు చెందిన చెక్కల శ్రీనివాస్‌(26)గా గుర్తించారు. కుటుంబ సభ్యులకు సమాచారం అందించారు. వారు తెలిపిన వివరాల ప్రకారం శ్రీనివాస్‌ హైదరాబాద్‌లోని ఓ ఆటో గ్యారేజీలో పనిచేసేవాడు. కొద్దిరోజుల క్రితం అతడు నడుపుతున్న ఆటో ప్రమాదానికి గురికావడం, బాధితుడు కేసు పెట్టడంతో యజమాని పనిలోంచి తీసేశాడు. దీంతో స్వగ్రామానికి వెళ్లిపోయాడు. తన భవిష్యత్తుపై తీవ్ర మనస్తాపానికి గురయ్యేవాడు. ఈ నేపథ్యంలో ఆత్మహత్యకు పాల్పడ్డాడు. మృతుడికి భార్య, ఇద్దరు పిల్లలు ఉన్నారు. కేసు నమోదు చేసినట్లు రైల్వే ఎస్సై సయ్యద్‌ అక్బర్‌ తెలిపారు.