విశ్వశాంతి ఉత్సవం.. పరిసమాప్తం

పూర్ణాహుతి చేపడుతున్న కృష్ణజ్యోతి స్వరూపానంద స్వామి

సిద్దిపేట, న్యూస్‌టుడే: సిద్దిపేటలో విశ్వశాంతి మహాయాగ మహోత్సవం అంగరంగ వైభవంగా ముగిసింది. శ్రీకృష్ణపీఠాధిపతి కృష్ణజ్యోతి స్వరూపానంద స్వామి నేతృత్వంలో 14 రోజుల పాటు కొనసాగిన మహాక్రతువుకు పూర్ణాహుతితో ముగింపు పలికారు. సిద్దిపేట సహా వివిధ ప్రాంతాలకు చెందిన ప్రజలు నిత్యం వేలాది మంది తరలిరాగా యాగ స్థలి కిక్కిరిసింది. శ్రీకృష్ణ కాలచక్రం పేరిట.. చేపట్టిన యాగంలో అయుత చండీ, అతిరుద్రం, చతుర్వేద పూర్వక మహాగణపతి, మహాసౌర, సుదర్శన, ఇతర హోమాలు జరిగాయి. వివిధ దేవతామూర్తుల కల్యాణాలు కనువిందు చేశాయి. శుక్రవారం గురుపూజ, అవబృధ స్నానం, ఉట్టికొట్టడం, రాధాకృష్ణ శాంతి కల్యాణం చేపట్టారు. రాత్రి పొద్దుపోయే వరకు ఆయా కార్యక్రమాలు జరిగాయి. చివరి రోజు పెద్దసంఖ్యలో భక్తులు తరలివచ్చారు. కుంకుమార్చన, శివాభిషేకాలు చేశారు. స్వామి ఆశీర్వచనం అందజేశారు.

165 అడుగుల రాధాకృష్ణ  విగ్రహంతో మందిర నిర్మాణం..

మహా పూర్ణాహుతికి ముందు అయుత చండీ, అతిరుద్ర హోమాల్లో మంత్రి హరీశ్‌రావు, శ్రీనిత దంపతులు పాల్గొన్నారు. మంత్రి మాట్లాడుతూ.. సిద్దిపేటలో 165 అడుగుల పాలరాతి రాధాకృష్ణ విగ్రహంతో కూడిన మందిరం నిర్మిస్తామని, వచ్చే ఫిబ్రవరిలో పనులకు అంకురార్పణ చేస్తామని ప్రకటించారు. మహాయాగంతో రాష్ట్రం, దేశం అభివృద్ధి సాధించాలని, ప్రజలంతా సుబిక్షంగా ఉండాలని ఆకాంక్షించారు. ఎఫ్‌డీసీ ఛైర్మన్‌ ప్రతాప్‌రెడ్డి, తితిదే పాలక మండలి సభ్యుడు మురంశెట్టి రాములు తదితరులు పాల్గొన్నారు.

హోమంలో పాల్గొన్న మంత్రి హరీశ్‌రావు దంపతులు