నిఖత్‌కు హరియాణా గవర్నర్‌ అభినందనలు

ఈనాడు, నిజామాబాద్‌: ప్రపంచ మహిళల బాక్సింగ్‌ ఛాంపియన్‌షిప్‌లో స్వర్ణం గెలిచిన నిఖత్‌ జరీన్‌ను హరియాణా గవర్నర్‌ బండారు దత్తాత్రేయ అభినందించారు. నిఖత్‌ తండ్రి జమీల్‌ అహ్మద్‌కు సోమవారం ఆయన ఫోన్‌ చేసి మాట్లాడారు. సంకల్పం ఉంటే.. అనుకున్నది సాధించగలమని నిఖత్‌ రుజువు చేసిందన్నారు. సమాజంలోని అసమానతలను దాటి ఇంతటి విజయాన్ని సొంతం చేసుకున్న ఆమె.. ఎందరో బాలికలకు స్ఫూర్తిదాయకంగా నిలుస్తుందన్నారు. విశ్వవిజేతగా నిలిచి దేశానికి, తెలంగాణకు కీర్తిని తెచ్చిందని, భవిష్యత్తులో మరిన్ని పతకాలు గెలుస్తుందని ఆకాంక్షించారు.