బాలుడి జీవితాన్ని చిదిమేసిన శునకం

నిషాన్ష్‌

మాక్లూర్‌, నిజామాబాద్‌ వైద్యవిభాగం, న్యూస్‌టుడే: అభం, శుభం తెలియని ఓ చిన్నారి జీవితాన్ని శునకం చిదిమేసింది. బాధిత కుటుంబంలో తీవ్ర విషాదం నింపింది. నిండు నూరేళ్లు హాయిగా ఉంటాడనుకున్న కుమారుడి ఆయుష్షు అయిదేళ్లకే తీరడంతో తల్లిదండ్రులు తట్టుకోలేక పోతున్నారు. తనయుడి అందమైన రూపాన్ని తలుచుకుంటూ దిక్కులు పెక్కుటిల్లేలా రోధించిన హృదయ విదారక ఘటన మాక్లూర్‌ మండలం కల్లెడిలో చోటు చేసుకుంది. వివరాళ్లోకి వెళ్తే.. బండారి మధు, రజిని దంపతులకు ముగ్గురు పిల్లలు. అందరి కంటే చిన్నవాడైన నిషాన్ష్‌(5) ఎల్‌కేజీ చదువుతున్నాడు. గత నెల 25న తాత ధర్మయ్యతో కలిసి పొలానికి వెళ్లాడు. తాత చరవాణి ఇచ్చి పనిలో నిమగ్నమయ్యాడు. ఆ సమయంలో కుక్క బాలుడిపై దాడిచేసి తీవ్రంగా గాయపర్చడంతో రక్తస్రావమైంది. వెంటనే చికిత్స నిమిత్తం నిజామాబాద్‌ ప్రభుత్వ జనరల్‌ ఆసుపత్రికి తీసుకురాగా చికిత్స అందించి ఇంటికి పంపించారు. ఈ నెల ఒకటో తేదీన రెండో డోసు సైతం ఇప్పించారు. రెండు రోజుల కిందట ఉన్నపలంగా వాంతులు, విపరీతమైన జ్వరం రావడంతో జిల్లా కేంద్రంలోని ప్రైవేటు ఆసుపత్రికి తీసుకొచ్చారు. హైదరాబాద్‌ తీసుకెళ్లాలని వైద్యులు సూచించారు. 7వ తేదీన తీసుకెళ్తుండగా రాత్రి 10.30కి మార్గమధ్యలో చిన్నారి మృతి చెందాడు. తల్లిదండ్రులు విలపించిన తీరు గ్రామస్థులను కంటతడి పెట్టించింది.