ఈ కష్టాలు ఎప్పుడు తీరేనో..?

న్యూస్‌టుడే, కొమరాడ: పరీక్షలు అంటే కొమరాడ మండలంలోని పలు గ్రామాల విద్యార్థులు ఆందోళన చెందుతున్నారు. పరీక్ష రాయడం కాకుండా.. కేంద్రానికి చేరుకోవడం వారికి కష్టంగా మారింది. ఇటీవల ఇంటర్మీడియట్‌ విద్యార్థులను వేధించిన సమస్య మళ్లీ ఇప్పుడు పది విద్యార్థులకు ఎదురైంది. నాగావళి నది ఆవల ఉన్న కొట్టు, తొడుములో చదువుతున్న వారికి కొమరాడ పరీక్ష కేంద్రంగా ఇచ్చారు. కానీ ఇక్కడ పూర్ణపాడు-లాబేసు వంతెన నిర్మాణం పూర్తికాకపోవడంతో విద్యార్థులు నదిలో నడిచి వచ్చారు. ఉదయం 9.30 గంటలకు కేంద్రానికి చేరాల్సి ఉండగా, ఏడు గంటలకే ఇళ్ల నుంచి బయలు దేరాల్సి వస్తోందని విద్యార్థులు వాపోతున్నారు.