వైకాపా సర్పంచి వీరంగం

గ్రామీణభీమిలి: భీమిలి మండల పరిషత్తు సర్వసభ్య సమావేశంలో మంగళవారం వైకాపా మద్దతుదారు, నారాయణరాజుపేట సర్పంచి వీరంగం సృష్టించడంతో ఉద్రిక్తత నెలకొంది. ఈ సమావేశంలో ఎంపీటీసీ సభ్యులు, సర్పంచులకు బదులు వారి బంధువులు, భర్తలు వచ్చి మాట్లాడటం ఏమిటని తెదేపా ఎమ్పీటీసీ సభ్యుడు కోరాడ రమణ తొలుత అభ్యంతరం వ్యక్తం చేశారు. ఎంపీపీ డి.సూర్యనారాయణరాజు ప్రతిస్పందిస్తూ ‘మీ పంచాయతీ సమస్యలుంటే చెప్పండి..మాపార్టీ నాయకులు సభకొస్తే మీకెందుకు’ అని బదులిచ్చారు. ఆ సమయంలో నారాయణరాజుపేట సర్పంచి సూర్యనారాయణ సంబంధిత ఎమ్పీటీసీ సభ్యుడిపై ఆగ్రహించారు. దీనిని కెమెరాతో చిత్రీకరిస్తున్న విలేకరులపైనా ఆయన కేకలు వేశారు. మరో పక్క వైకాపాకు చెందిన మరో ఇద్దరు సభ్యులు కూడా తెదేపా ఎమ్పీటీసీ సభ్యునితో వాగ్వాదానికి దిగారు. ఈ గొడవ జరిగిన కొద్దిసేపటి తర్వాత సమావేశానికి వచ్చిన ఎమ్మెల్యే ముత్తంశెట్టి శ్రీనివాసరావుకు దృష్టికి కోరాడ రమణ ఈ సమస్య తీసుకెళ్లారు. ఇక్కడ ప్రొటోకాల్‌ పాటించడం లేదని, అధికారిక సభలకు, సమావేశాలకు తనను పిలవడం లేదని, అభివృద్ధి పనుల సమాచారమూ చెప్పడం లేదంటూ వాపోయారు.