విశాఖపట్నం: విమర్శలు చేసేటప్పుడు ఏపీ పీసీసీ అధ్యక్షురాలు షర్మిల సంయమనం పాటించాలని మంత్రి బొత్స సత్యనారాయణ అన్నారు. ఆమె ఒక పార్టీలో ఉన్నారని, దాని ప్రకారం మాట్లాడుతున్నారన్నారు. విశాఖలో ఆయన మీడియాతో మాట్లాడుతూ.. తమపై ఆధారపడే ప్రభుత్వం కేంద్రంలో రావాలని కోరుకుంటున్నట్లు చెప్పారు. ‘‘ఆమె ఇటీవల వరకు సీఎం జగన్‌కు చెల్లి.. ఇప్పుడు ప్రత్యర్థి పార్టీకి నాయకురాలు. ఇక చెల్లి, అన్న.. అనుబంధాలు ఎక్కడ ఉంటాయి?’’ అని బొత్స వ్యాఖ్యానించారు. తలకు పెట్టిన బ్యాండేజీ తీసేయాలంటూ జగన్‌కు.. వివేకా కుమార్తె సునీత ఇచ్చిన సలహాపైనా బొత్స స్పందించారు. బ్యాండేజీ ఉంచాలా.. తీసేయాలా.. అనేది డాక్టర్లు చూసుకుంటారని వ్యాఖ్యానించారు.