‘కేంద్ర బడ్జెట్లో బీసీలకు తీరని అన్యాయం’

ఏలూరు టూటౌన్‌, న్యూస్‌టుడే: కేంద్ర బడ్జెట్లో బీసీలకు రూ.2 వేల కోట్లు మాత్రమే కేటాయించడం ద్వారా వారికి అన్యాయం చేశారని జాతీయ బీసీ సంక్షేమ సంఘం రాష్ట్ర కన్వీనర్‌ బోను దుర్గానరేష్‌ అన్నారు. ఏలూరులో శనివారం నిర్వహించిన విలేకరుల సమావేశంలో ఆయన మాట్లాడుతూ కేంద్రం కళ్లు తెరిపించేందుకు బీసీల సత్తా చాటేందుకు ఈ నెల 8, 9 తేదీల్లో చలో దిల్లీ కార్యక్రమం చేపట్టామన్నారు. దిల్లీలో జంతర్‌మంతర్‌ వద్ద నిర్వహించే ఈ కార్యక్రమాన్ని విజయవంతం చేయాలని పిలుపునిచ్చారు. సంఘ రాష్ట్ర మహిళ కన్వీనర్‌ భీమవరపు హేమ సుందరి, సంఘ జిల్లా అధ్యక్షుడు భీమవరపు సురేష్‌, నాయకులు నివాస్‌, సాయికిరణ్‌, దినేష్‌ తదితరులు పాల్గొన్నారు.