తుని, న్యూస్‌టుడే: తెదేపాను వీడి, వైకాపాలో చేరనున్నట్లు శాసనమండలి ప్రతిపక్ష నేత యనమల రామకృష్ణుడి సోదరుడు యనమల కృష్ణుడు ప్రకటించారు. కాకినాడ జిల్లా తునిలో కృష్ణుడు శుక్రవారం విలేకర్లతో మాట్లాడుతూ తన రాజీనామాను పార్టీ అధినేత చంద్రబాబుకు పంపుతున్నానని వెల్లడించారు. తాను 42 ఏళ్లు పార్టీకి సేవ చేసినా గుర్తింపు లేక, మనస్తాపానికి గురైనట్లు తెలిపారు. గతంలో రెండుసార్లు టికెట్‌ ఇచ్చినా, వివిధ కారణాలతో ఓడిపోయానని, ఈసారి ప్రజల్లో మంచి ఊపు ఉండి, తన విజయం సునాయాసం కాగలదని భావించానన్నారు. ఈ తరుణంలో మాజీ మంత్రి, అన్న యనమల రామకృష్ణుడు ఆయన కుమార్తెకు సీటు ఇప్పించుకున్నారని విమర్శించారు. తెదేపా అధికారంలోకి వస్తే మళ్లీ ఆయనే ఎమ్మెల్సీ అవుతారని, ఇన్నేళ్లు కష్టపడ్డ తానేం కావాలని ప్రశ్నించారు. అందుకే తాను వైకాపాలో చేరేందుకు నిర్ణయం తీసుకున్నానని ప్రకటించారు. పార్టీలో మరో సీనియర్‌ నేత పోల్నాటి శేషగిరిరావు మాట్లాడుతూ తానూ రాజీనామా చేసి కృష్ణుడి వెంటే వెళుతున్నానన్నారు.