ఈనాడు డిజిటల్‌, అమరావతి: ఐదేళ్ల సీఎం జగన్‌ విధ్వంసకర పాలనలో రూ.8 లక్షల కోట్ల అవినీతి జరిగిందని ఎన్డీయే నేతలు ఆరోపించారు. వైకాపా ప్రభుత్వ అసమర్థ ఆర్థిక నిర్వహణతో రూ.14 లక్షల కోట్లు అప్పులు చేశారని మండిపడ్డారు. విజయవాడలోని భాజపా కార్యాలయంలో ఆ పార్టీ రాష్ట్ర ముఖ్య అధికార ప్రతినిధి లంకా దినకర్‌, తెదేపా పొలిట్‌బ్యూరో సభ్యుడు బొండా ఉమామహేశ్వరరావు, జనసేన అధికార ప్రతినిధి రాయపాటి అరుణలు సోమవారం విలేకర్లతో మాట్లాడారు. ‘మూలధన వ్యయానికి సంబంధించి 8% సగటున ఒక్కో ఏడాదికి రాష్ట్ర ప్రభుత్వం చేసిన ఖర్చు రూ.16 వేల కోట్లు మాత్రమే. సాగునీటి ప్రాజెక్టుల కోసం రూ.26 వేల కోట్లలోపే వ్యయం చేశారు. 2014-19లో తెలంగాణతో పోలిస్తే రాష్ట్ర వసూళ్లు 15.95% అధికం. అదే.. జగన్‌ పాలనలో 6.4% మాత్రమే. 2014-19లో రాష్ట్ర తలసరి స్థూల ఉత్పత్తి సగటు వృద్ధి 12.79% ఉండగా, వైకాపా ప్రభుత్వ హయాంలో అది 9.45%గా నమోదైంది. ప్రత్యక్ష పెట్టుబడుల ఆకర్షణలో దేశంలోనే 5వ స్థానంలో ఉన్న రాష్ట్రాన్ని 14వ స్థానానికి దిగజార్చారు’ అని దినకర్‌ వివరించారు.