మంత్రి అప్పలరాజు స్వగ్రామంలో పేట్రేగిన వైకాపా నాయకులు

ఈనాడు డిజిటల్‌ శ్రీకాకుళం: మంత్రి సీదిరి అప్పలరాజు స్వగ్రామం.. శ్రీకాకుళం జిల్లా వజ్రపుకొత్తూరు మండలం దేవునల్తాడలో బుధవారం రాత్రి వైకాపా నాయకులు పేట్రేగిపోయారు. తెదేపా ప్రచార రథం డ్రైవర్‌పై దాడికి పాల్పడ్డారు. తెదేపా ఎంపీ, పలాస ఎమ్మెల్యే అభ్యర్థులు... రామ్మోహన్‌నాయుడు, గౌతు శిరీష రెండు ప్రచార రథాలపై గ్రామానికి వచ్చారు. ఇంటింటి ప్రచారం ముగించుకుని రామ్మోహన్‌నాయుడి ప్రచార రథంపై తిరిగి వెళ్తున్నారు. వారి వెనుక కాస్త దూరంలో గౌతు శిరీష ప్రచార రథం వెళ్తోంది. ఆ సమయంలో గ్రామానికి చెందిన వైకాపా నాయకులు కవ్వింపు చర్యలకు పాల్పడ్డారు. ఎంపీటీసీ సభ్యుడు సౌదాల వెంకన్న, వైకాపా కార్యకర్తలు కొందరు... శిరీష ప్రచార రథంపై దాడి చేశారు. రథంపై ఉన్న మాజీ మంత్రి గౌతు శివాజీ చిత్రాన్ని ధ్వంసం చేశారు. అద్దాలు పగలగొట్టేందుకు యత్నించారు. ఎందుకిలా చేస్తున్నారని డ్రైవర్‌ ప్రశ్నించగా అతనిపై దాడికి పాల్పడ్డారు. వాహనం తాళాలు తీసుకోవడానికి యత్నించారు. విషయం తెలిసి తెదేపా శ్రేణులు అక్కడికి చేరుకోవడంతో ఇరు వర్గాల మధ్య తోపులాట చోటుచేసుకుంది. మంత్రి సీదిరి అప్పలరాజు ప్రోద్బలంతో మద్యం మత్తులో వైకాపా అల్లరి మూకలు దాడికి పాల్పడ్డాయని స్థానికులు ఆరోపించారు. మంత్రిపై వ్యతిరేకతతో జనం ప్రచార ర్యాలీకి స్వచ్ఛందంగా పెద్దఎత్తున తరలిరావడంతో ఓర్వలేక ఇలా చేశారని విమర్శించారు.