ఈనాడు డిజిటల్‌, అమరావతి: ఈ ఐదేళ్లలో ఆలయాలు, అర్చకులపై జరిగిన దాడులపై ఎన్డీయే ప్రభుత్వం ఏర్పడిన వెంటనే ప్రత్యేక కమిషన్‌ ఏర్పాటు చేసి, విచారణ చేయిస్తామని తెదేపా బ్రాహ్మణ సాధికార సమితి రాష్ట్ర అధ్యక్షుడు బుచ్చి రాంప్రసాద్‌ తెలిపారు. నిందితులు ఎంతటి వారైనా శిక్షిస్తామని హెచ్చరించారు. వైకాపా మ్యానిఫెస్టోలో బ్రాహ్మణ సంక్షేమం అన్న మాటే లేదని ఆగ్రహం వ్యక్తం చేశారు. 2019 ఇచ్చిన హామీలనూ జగన్‌ విస్మరించారని దుయ్యబట్టారు. బ్రాహ్మణ సంక్షేమం, అభివృద్ధి, భద్రతకు అధిక ప్రాధాన్యం ఇస్తూ.. తెదేపా, జనసేన మ్యానిఫెస్టో రూపకల్పన చేసినట్టు తెలిపారు. మంగళగిరిలోని తెదేపా కేంద్ర కార్యాలయంలో గురువారం ఆయన విలేకరులతో మాట్లాడారు. ‘‘గతంలో ఎన్నడూ లేని విధంగా జగన్‌ పాలనలో ఆలయాలపై దాడులు జరిగాయి. విగ్రహాలు ధ్వంసం చేశారు. విజయవాడలోని బ్రాహ్మణ కార్పొరేషన్‌ భవనాన్ని పాడుపెట్టారు’’ అని బుచ్చి రాంప్రసాద్‌ ఆగ్రహం వ్యక్తం చేశారు.